«Մի կողմ դրե́ք բոլոր քաղաքական կողմնորոշումները և որպես հայ՝ սկսեք ձեր պայքարը». Վիտալի Պետրոսյան

Արցախցի գրող Վիտալի Պետրոսյանը գրել է. «Հարգելի՛ հայրենակիցներ, հատկապես Սփյուռքում ապրող հայե՛ր: Արցախում իրավիճակն իրո՛ք օրհասական է: Ես գիտեմ, ես հասկանում եմ, որ դուք հիասթափված եք ՀՀ և ԱՀ քաղաքական ղեկավարություններից ու նրանց գործողություններից, բայց այստեղ ապրող մարդիկ, հատկապես Արցախում ապրող հայերը, արդեն դարձել են նրանց «քաղաքականության» գերիները և հայտնվել թշնամու պաշարման մեջ: Մեր առջև ծառացած խնդիրները մեզ տանում են պատերազմի այնպիսի թշնամու դեմ, որ թուրքիա և ադրբեջան է, իսկ մենք չունենք նույնիսկ ԱՐՑԱԽԸ ադրբեջան համարող ՀՀ քաղաքական ղեկավարության ու նրանց ընտրած բնակչության աջակցությունը: ազերիստանը մեզ փորձում է ներքաշել պատերազմի մեջ և մեզ «մեղավոր ճանաչելով» լուծել մեր հարցերը մեկընդմիշտ: Մենք, շրջափակման մեջ լինելով, արտաքին աշխարհից չենք կարողանալու համալրել մեր սպառված ռազմական ու նյութական պաշարները և դուք ականատես եք լինելու 21-րդ դարում իրականացված ցեղասպանությանը, բռնի այլ երկրի քաղաքացի դառնալու կամ հավատափոխ լինելու դժնդակ երևույթին:
Որպես Արցախի Հանրապետության քաղաքացի, որպես հայ, որպես հայ բանաստեղծ, որպես ուսուցիչ, ես ձեզ խնդրում եմ, մի կողմ դրեք բոլոր քաղաքական կողմնորոշումները և որպես հայ սկսեք ձեր պայքարը այն երկրներում, որտեղ ապրում եք՝ հանուն Արցախի:
Իսկ ՀՀ-ում ապրող գիտակից հայությանն ուղղակի խնդրում եմ, մի կողմ դնել քաղաքականությունը և ցանկացած գնով տապալել նիկոլ կոչվող նեռի, տականքի իշխանությունը: Հետո գլխներիդ եք տալու, բայց ուշ է լինելու: Մեզ պետք չէ, որ մեր մահը ողբաք, մեզ պետք է ձեր աջակցությունը, որպեսզի մենք չմահանանք»: