«Որո՞նք են Հայաստանի «կարմիր գծերը» Ադրբեջանի հետ բանակցություններում». հարց՝ Փաշինյանին

Ֆրանս-պրեսս գործակալության հետ հարցազրույցի ընթացքում՝ ՀՀ վարչապետ Նիկոլ Փաշինյանն անդրադարձավ Արցախում տիրող հումանիտար ճգնաժամի և դրա հետևանքով առաջացած խնդիրներին: Նա նշեց, որ բանակցային ճանապարհով հարցերը լուծելու մեթոդը միակն է:

Պատասխանելով հարցին, թե որո՞նք են այդ պրոցեսում իր կարմիր գծերը, Փաշինյանն ասաց․ «Հայաստանի տարածքային ամբողջականությունը, ինքնիշխանությունը և Լեռնային Ղարաբաղի հայության իրավունքներն ու անվտանգությունը։ Շատ կարևոր է, որ այս տերմիններն արտահայտեն այնպես, որ մարդը կարողանա կիրառել և իրավունքներ ու այնպիսի անվտանգություն ունենա, որն իրեն իր միջավայրին հնարավորություն կտան ապրելու։ Մեր դիրքորոշմամբ՝ ԼՂ ժողովուրդի իրավունքի և անտանգության հարցը պետք է հասցեագրվի հենց ԼՂ ներկայացուցիչների մասնակցությամբ տեղի ունեցող երկխոսության, բանակցությունների արդյունքում։ Մենք դա անվանում ենք Բաքու-Ստեփանակերտ երկխոսություն, բայց հաշվի առնելով ուժերի անհամաչափելիությունը, կարծում ենք, որ եթե մենք Ստեփանակերտին ու Բաքվին թողնենք դեմ դիմաց, Բաքուն հնարավորություն կունենա կամ մոռացության մատնել այդ օրակարգը, կամ լինել մենախոսողի և ոչ թե երկխոսողի դերում։ Մեր ընկալմամբ՝ այդ խոսակցությունը պետք է տեղի ունենա միջազգային մեխանիզմների շրջանակում, որտեղ վկան կլինի միջազգային հանրությունը։ Հայաստանի պարագան բարդ է նրանով, որ Հայաստանի շահագրգռվածությունն այդ գործընթացում Ադրբեջանն ընկալում ու մեկնաբանում է որպես ոտնձգություն կամ նկրտում Ադրբեջանի տարածքային ամբողջականության նկատմամբ»։