Դեռևս չենք կարողանում Լաչինի միջանցքով օգնություն հասցնել ԼՂ․ ԿԽՄԿ-ն հանդես է եկել կոչով

ԿԽՄԿ-ն հայտարարում է, որ չնայած համառ ջանքերին, այս պահին դեռևս չեն կարողանում օգնություն հասցնել Լաչինի միջանցքով կամ այլ երթուղիներով:

«Կազմակերպությունը կոչ է անում պատասխանատուներին թույլ տալ ԿԽՄԿ-ին վերսկսել իր հիմնական մարդասիրական գործողությունները այդ տարածքում»,-ասված է հաղորդագրության մեջ։

ԿԽՄԿ-ն հիշեցնում է, որ տասնյակ հազարավոր մարդիկ սննդամթերքի և առաջին անհրաժեշտության ապրանքների խիստ պակաս ունեն, իսկ սակավաթիվ առկա ապրանքները չափազանց թանկ են։

Ըստ կոմիտեի տարածած հաղորդագրության՝ վերջին անգամ ԿԽՄԿ-ին շաբաթներ առաջ են թույլ տվել տարածաշրջան հասցնել բժշկական պարագաներ և սննդամթերք։

«Մեր մարդասիրական օգնության ավտոշարասյուները փրկօղակ են այս տարածքի բնակչության համար: Այս ավտոշարասյունների արգելափակման պայմաններում մեր մտահոգությունն այն է, որ հումանիտար իրավիճակն է՛լ ավելի կվատթարանա։ Մեզ ամենից շատ անհանգստացնում են անօգնական մարդիկ։ Հատկապես վտանգի տակ են հիվանդներն ու քրոնիկ հիվանդություններ ունեցող մարդիկ, ինչպես նաև տարեցները, տկարներն ու երեխաները։ Այստեղ գործելու համար մեզ անհրաժեշտ է, որ կողմերը հասնեն մարդասիրական կոնսենսուսի։ Սա կյանքեր փրկող աշխատանք է, և պետք է թույլ տալ, որ այն շարունակվի»,- ասել է ԿԽՄԿ-ի Եվրասիայի տարածաշրջանային տնօրեն Արիան Բաուերը։