Հայտնի է՝ ինչ կեղծ մեղադրանքներով է հակառակորդը ձերբակալել Վագիֆ Խաչատուրյանին

Ադրբեջանական կողմը հայտարարել է, թե ինչ մեղադրանք է ներկայացրել Արցախի Հանրապետության բնակիչ Վագիվ Խաչատուրյանի նկատմամբ: «Խաչատրյանը ներգրավված է Ադրբեջանի դատախազության կողմից հարուցված քրեական գործով 1991 թվականի դեկտեմբերի 22-ին Խոջալուի շրջանի Մեշալի գյուղում հայկական ապօրինի զինված խմբավորումների անդամների կողմից ցեղասպանության, ազգությամբ ադրբեջանցի մարդկանց տեղահանության, պետությանը պատկանող մեծաքանակ գույքի ոչնչացման և վնասման փաստերով։

Քննությամբ պարզվել է, որ նշված օրը 1955 թվականին ծնված Ադրբեջանի քաղաքացի, ծնունդով Ասկերանի շրջանի Բադարա գյուղից, այս գյուղում բնակվող Վագիֆ Չերքեզի Խաչատուրյանն, ով վարորդ է աշխատել ք. Խանքենդին (հակառակորդն արդպես է կոչում Ստեփանակերտը) Մեշալի գյուղում ազգությամբ հայ այլ անձանց հետ, օգտագործելով տարբեր զինատեսակներ, այդ թվում՝ հրազեն և հետևակի մարտական ​​մեքենաներ, զինված հարձակում է իրականացրել այս գյուղի վրա. զոհվել է ազգությամբ ադրբեջանցի 25 մարդ, 14 հոգի ստացել են տարբեր ծանրության մարմնական վնասվածքներ, 358 մարդ բռնի ուժով վտարվել է օրինական բնակության վայրերից։

Բացի այդ, Խաչատուրյանը, շարունակելով համատեղ հանցավոր գործողությունները այն անձանց հետ, ում հետ նախկինում պայմանավորվել է, պետությանը և գյուղացիների գույքին պատճառել է 5 մլն 496 հազար 900 մանաթ ընդհանուր գումարի նյութական վնաս։

2013 թվականի նոյեմբերի 12-ին Վագիֆ Չերքեզի Խաչատուրյանի նկատմամբ միջազգային հետախուզում է հայտարարվել՝ որպես մեղադրյալ՝ ԱՀ քրեական օրենսգրքի 103 (ցեղասպանություն) և 107 (արտաքսում կամ բռնի վերաբնակեցում) հոդվածներով։ Դատարանի որոշմամբ նրա նկատմամբ խափանման միջոց է ընտրվել կալանավորումը։

Որոնողական աշխատանքների արդյունքում 2023 թվականի հուլիսի 29-ին ադրբեջանա-հայկական պետական ​​սահմանի Լաչինի սահմանային անցակետում պետական ​​սահմանապահ ծառայության զինծառայողները բերման են ենթարկել Վագիֆ Խաչատուրյանին՝ Կարմիր խաչի միջազգային կոմիտեի միջոցով Հայաստան ուղևորվելու ժամանակ:

Խաչատուրյանը տեղավորվելու է Բաքվի բուժհաստատությունում՝ ապահովվելու է նրան անհրաժեշտ բժշկական օգնությունը, ինչպես նաև պայմաններ են ստեղծվելու ԿԽՄԿ-ի ներկայացուցիչների կողմից նրան այցելելու համար։

Այս պահին ձեռնարկվում են անհրաժեշտ օպերատիվ-հետախուզական միջոցառումներ՝ քրեական գործով մյուս մեղադրյալներին պատասխանատվության ենթարկելու ուղղությամբ»,- ասվում է հակառակորդի հայտարարության մեջ։