«Իշխանության թեզերը, որ Արցախը հանձնելով ՀՀ քաղաքացին ավելի անվտանգ է ապրելու, այլևս մահացել են». Տ. Աբրահամյան

«Կոնկրետ Հայաստանի հետ կապված, կարծում եմ, իրավիճակը շատ պարզ է: Հայաստանի կողմից չէր կարող լինել համարժեք արձագանք այն պարագայում, երբ որ նույն ինքը՝ ՀՀ իշխանությունը հայտարարում է, որ պատրաստ է Արցախը ճանաչել Ադրբեջանի կազմում»,- 24TV-ի եթերում ասաց ԱԺ «Պատիվ ունեմ» խմբակցության քարտուղար Տիգրան Աբրահամյանը՝ անդրադառնալով Արցախում տեղի ունեցող զարգացումներին:

Խոսելով իշխանությունների կողմից շրջանառվող թեզերից, թե Արցախի հանձնման պարագայում ՀՀ քաղաքացին ավելի լավ և անվտանգ է ապրելու, Աբրահամյանն ասաց. «Հայաստանում ապրող մարդը տեսավ, որ ինքը ո՛չ անվտանգ է, ո՛չ ավելի լավ է ապրում, և այս թեզերը, որ երկար ժամանակ աշխատում էր, հիմա մահացել են: Այսօր ես տեսնում եմ, որ արդեն թույլ արտահատված ձևով գիտակցում կա հասարակության մեծամասնության մոտ, որ իրականության մեջ Արցախը հայկական ճակատի մի ուղղությունն է, և եթե այդ ճակատը հանկարծ ընկնի, ապա այդ ճակատը տեղափոխվելու է այլ ուղղություն»: