«Չեք գտնի մի ասֆալտապատվող փողոց, որտեղ հաջորդ օրն իսկ չկան ակնառու թերություններ». Հակոբ Բադալյան

Քաղաքական մեկնաբան Հակոբ Բադալյանի ֆեյսբուքյան գրառումը. «Երևանում կատարվող փողոցային ասֆալտապատման անորակությունը տեսանելի է անզեն աչքով: Գրեթե չեք գտնի մի ասֆալտապատվող փողոց, որտեղ կամ հենց հաջորդ օրն իսկ չկան ակնառու թերություններ, կամ դրանք չեն առաջանում ընդամենը մի քանի օր անց:
Ափսոս են, պարզապես ափսոս են հանրային այդ ռեսուրսները: Իսկ դրա պատճառն այն է, որ չկան կառավարման, վերահսկողության ստանդարտներ, չկան աշխատանքի գնահատման բարձր ստանդարտներ:
Իսկ դա արդեն չի վերաբերում միայն ասֆալտապատմանը, այլ համընդհանուր երեւույթ է, որ ցավալիորեն բնորոշ է կառավարման բոլոր ուղղություններին:
Դրա փոխարեն, վարչապետը պաշտոնյաներին հանձնարարում է «դուրս գալ» կաբինետներից, մարդկանց հետ շփվել, որ խնդիրներին ծանոթանան:
Սա ևս կառավարման ցածրորակ ստանդարտի դրսեւորում է, պայմանական ասած՝ միջնադարյան ստանդարտ, երբ թագավորը կամ իշխանը չարչու պես հագնվում էր և շրջում թագավորությունում: Կառավարման արվեստը այդ ընթացքում արձանագրել է հսկայական առաջընթաց, որպեսզի պաշտոնյան արդյունավետ աշխատի հենց իր կաբինետում, քանի որ իր կաբինետում անարդյունավետ պաշտոնյան դրանից դուրս գալով ինքնաբերաբար չի դառնում արդյունավետ: Ընդամենը հասարակության աչքին է առժամանակ ինչ-որ բան սկսում այլ երևալ, որը ընդամենը ժամանակավոր կառավարչական էֆեկտ է»։