«Սկսած անվտանգ երթևեկությունից՝ վերջացրած խրամատ փորելը, կառավարության պարտականությունն է»․ Վրթանեսյան

«Ռազմինֆո» մասնագիտացված կայքի համակարգող Կարեն Վրթանեսյանը ֆեյսբուքյան իր էջում գրել է. «Ֆրենդերիցս շատերը գրում են. «Ի՞նչ արվեց Սուրմալուի պայթյունից կամ հրդեհում 15 զինվոր զոհվելուց հետո, որ նման բաներ չկրկնվեն։ Ոչ մի բան։ Նույնն էլ հիմա է լինելու։ Մի քիչ կգրենք Ֆեյսբուքում ու 2 օրից կմոռանանք»։
Որպես փաստ, այո՛, ճիշտ եք գրում, բայց սա շատ սխալ մոտեցում է։
Որովհետև եթե անվտանգային իրավիճակը՝ երկրի սահմաններից մինչև երթևեկություն, տոնավաճառներից մինչև սննդի որակ, աղետալի է և մարդիկ, որոնք ի պաշտոնե պարտավոր են այդ անվտանգությունն ապահովել (ու դրա համար իմ և ձեր գրպանից շատ ճոխ վճարվում են), բայց չեն ապահովել, չպետք է ուղղակի 1-2 օր սպասեն, մինչև վրդովմունքի հերթական ալիքը իջնի ու հանգիստ շարունակեն մեր հաշվին ապրել։
Պետք չի նաև մեղքը փնտրել մեր մեջ. սկսած անվտանգ երթևեկությունից, վերջացրած խրամատ փորելով՝ կառավարության պարտականությունն է։
Եւ ուրեմն կա՛մ պետք է ստիպես, որ կառավարությունն իր պարտականությունները կատարի (չեմ հավատում, որ թուրքերի շահերը սպասարկող օկուպացիոն վարչակարգը դա անելու է), կա՛մ էլ այդ կառավարությունը փոխես։
«Շոֆերները լավը չեն», «զինվորականները լավը չեն», «մենք լավը չենք» խոսույթները հարիֆների համար են, որովհետև այդ ամեն ինչը պետությունն է պարտավոր նորմավորել ու ստիպել, որ նորմերը կատարվեն»։