«Դպրոցն ընդառաջ է գնացել հանրային անբարոյականության հաղթարշավին». Կարպիս Փաշոյան

Հրապարակախոս Կարպիս Փաշոյանը ֆեյսբուքյան իր էջում գրել է․ «Բռնաբարությունն ամենասարսափելի բանն է, որ կարող է պատահել աղջիկ երեխայի հետ, այն էլ սեփական հոր կողմից։ Դրանից հետո նվազագույնն, ինչ կարող է անել հասարակությունը, ապրումակցելն է, օգնելը, հոգ տանելը, պաշտպանելը, փայփայելը, առանձնահատուկ խնամքով ուշադրության կենտրոնում պահելը։ Փոխարենը՝ այդ նույն հասարակությունն իր բացառիկ անբարոյականության, տգիտության և քաղքենիության դիրքերից ավելի է խորացրել խնդիրը, երեխային մեկուսացրել՝ հռչակելով որպես վարակի աղբյուր, սպառնալիք, վտանգ։ Փաստացի անպաշտպան երեխային էլ ավելի են գլորել անդունդը, իսկ դպրոցը՝ կրթության և լուսավորության աղբյուր հորջորջվող հաստատությունը, ընդառաջ է գնացել հանրային անբարոյականության հաղթարշավին»։