«Արցախում մնացած մեծամեծերի ո՛չ փորերն են մաշվում, ո՛չ թշերն են նստում». Կ. Հարությունյան

Խմբագիր Կարեն Հարությունյանը ֆեյսբուքյան իր էջում գրել է. «Օգոստոսի 30-ից Արցախում յուրաքանչյուր ընտանիքի օրական կվաճառվի մեկ հաց, հայտարարել է Արցախի կառավարությունը։ Ալյուրի պաշարները սպառման եզրին են։
Շրջափակման հետևանքով Արցախում հացի սպառումը եռապատկվել է։ Ուտելու ոչինչ կամ գրեթե ոչինչ չկա, բացի հացից։ Հիմա դա էլ գրեթե չկա։
«Սպայկայի» 19 բեռնատարներով Հայաստանի ուղարկած 400 տոննա մարդասիրական բեռը հուլիսի 26-ից Կոռնիձորում կանգնած է։
Օգոստոսի 30-ի առավոտյան Ֆրանսիայի քաղաքներից Արցախի համար մարդասիրական բեռներով մեքենաները Երևանի կենտրոնից շարժվեցին Կոռնիձոր։ Նրանք Կոռնիձորում կընկերանան «Սպայկայի» բեռնատարների հետ։
Արցախի նախկին պետնախարար Ռուբեն Վարդանյանը «լավ լուր» է հաղորդում, որ Լիխտենշտեյնի արքայազնը պատրաստ է գլխավորել դեպի Արցախ մարդասիրական օդային օգնությունը։ Թե ինչպես է կամիկաձեի դեր ստանձնող նորին գերազանցության օդանավը գալու Արցախ ու որտեղ/ինչպես է վայրէջք կատարելու, չգիտենք։ Լավ լուրը չեղած հացից լավ է։
Արցախի նախագահ Արայիկ Հարությունյանը հայտարարում է, որ գործելու է միայն մեկ ճանապարհ՝ Լաչինի ճանապարհը։ Երկրի ղեկավարն իր քաղաքացիներին որևէ այլ լավ լուր չունի ասելու։
Օգոստոսի 29-ին Ադրբեջանն իր Կարմիր մահիկի ազգային ընկերության բեռնատարներով 40 տոննա բեռ է ուղարկում Աղդամի կողմից՝ դա քաղաքական զենք դարձնելով։ Ասկերանի մատույցներում քաղաքացիները բողոքի ցույց են անում ընդդեմ ադրբեջանական ալյուրի՝ թույլ չտալով դրա մուտքն Արցախ։
Հայաստանի վարչապետ Նիկոլ Փաշինյանը հայտարարում է, թե «ծրագրեր են մշակվում Լեռնային Ղարաբաղից ելք թույլ տալու, մուտք թույլ չտալու ուղղությամբ»։
Արցախից օրական մինչև 200 հոգի դուրս է գալիս՝ ուսման, բուժման ու այլ նպատակներով։
Արցախի պաշտոնյաներից շատերն արդեն ընտանիքներին հանել են այնտեղից։ Արցախի այլ մեծամեծեր ու գեներալներ վաղուց արդեն Երևանում են։
Իսկ Արցախում մնացած մեծամեծերի ո՛չ փորերն են մաշվում, ո՛չ թշերն են նստում։
Երևանյան հայրենասերները կոչ են անում մինչև վերջ պայքարել ու չհանձնվել։ Չէ՞ որ սովից մեռնողը նրանց երեխաները չեն։
Ես, ի տարբերություն ձեզ, չգիտեմ՝ ճիշտը որն է»։