«Մեծ հանրահավաք կազմակերպելու կարողություն ունեցող միավորները սնուցվում են «դրսից» կամ հաշվետու են «դրսին»». Կարեն Հեքիմյան

Պահպանողական կուսակցության նախագահ Կարեն Հեքիմյանի ֆեյսբուքյան գրառումը. «Չարժի ծաղրել կամ փնովել հանրահավաքը և դրա կազմակերպիչներին: Ունենք այն, ինչ ունենք:
Ինքնուրույն՝ Հայաստանից սնուցվող քաղաքական միավորներ մեր երկրում գրեթե չկան: Եթե կան, ապա շատ թույլ են: Ըստ այդմ, մեծ հանրահավաք կազմակերպելու կարողություն ունեցող միավորները սնուցվում են «դրսից» կամ հաշվետու են «դրսին»: Այս իմաստով, կայացած կամ նախատեսվող քաղաքական միջոցառումների հակագովազդ իրականացնելն անիմաստ է: Դրանք ամեն դեպքում կայանալու են, քանզի «դրսերից» մեկի հետ համաձայնեցված են, իսկ կազմակերպիչները, նույն «դրսից», իրենց հետագա քայլերի համաձայնեցման մշտապես սպասման մեջ են:
Կարծում եմ՝ մեր երկրում այսպես է լինելու, ամենաքիչը՝ մի քանի տասնյակ տարի:
Վստահ չեմ, որ դրանից հետո հաստատապես ինչ-որ բան է փոխվելու, սակայն համոզված եմ, որ հենց այս պահին, այս տարածքում հայկականությունը փրկել է պետք, քանզի դրա գոյությունը վտանգված է օրվա իշխանության խայտառակ գործունեության արդյունքում: Այդ իսկ պատճառով, օրվա իշխանության հեռացման պահանջով հանրահավաքները և դրանց կազմակերպիչներին ծաղրելու կամ փնովելու փոխարեն, անհրաժեշտ է միմյանց օգնել կամ չխանգարել: Եթե, իհարկե, ցանկանում ենք տարածքում հայկականությունը պահպանել»: