«Այս պատկերը հերքում է թեզը, թե մեր ժողովուրդն անտարբեր է իր հայրենիքի ճակատագրի նկատմամբ». Վահրամ Մարտիրոսյան

Գործարար Վահրամ Մարտիրոսյանը ֆեյսբուքյան իր էջում գրել է. «Եթե վերջին հանրահավաքից հանենք կազմակերպիչների հետ փոխկապակցված անձանց, ապա կստացվի մոտ 8 հազար գիտակից, հայրենասեր և քաղաքականապես ակտիվ քաղաքացիների մեծ խումբ։
Այս թիվը ավելին քան բավարար է իշխանափոխություն սկսելու ստարտային պայմանների համար։ Եթե սրան գումարենք Հայաքվեի 58.000 գիտակից և ակտիվ քաղաքացիներին, հետո գումարենք այն մարդկանց, ովքեր «ՀայաՔվե»-ին չեն մասնակցել զուտ միջոցի հետ համամիտ չլինելու պատճառով, բայց նպատակի հետ միակարծիք են, և պատրաստ են ակտիվ մասնակցության, ապա ստացվում է մի հսկայական պոտենցիալ։ Ընդհանրապես համարվում է, որ եթե բնակչության 2% դուրս է գալիս փողոց, ապա քաղաքական փոփոխությունները անխուսափելի են դառնում։ Իսկ հենց այս պահին ակտիվի պոտենցիալը 2%-ի շեմը գերազանցում է մոտ 2 անգամ։
Այս պատկերը հերքում է թեզը թե մեր ժողովուրդը անտարբեր իր հայրենիքի ճակատագրի նկատմամբ։ Բնական հարց է առաջանում՝ բա ինչի՞ չի իրականացվում։ Հարցի պատասխանը հենց երեկվա հանրահավաքն էլ տալիս է։ Խոսեցին շատերը, խոսեցին էմոցիոնալ, խոսեցին պաթեթիկ, հայտնեցին ցանկություններ, բայց այդպես էլ չձևակերպվեցին քաղաքական խնդիրները և դրանց լուծման ճանապարհային քարտեզը։ Փաշինյանի հրաժարականը ոչ թե խնդիր է այլ միջանկյալ նպատակ։ Այդ նպատակի տակ պետք է դրված լինեն խնդիրների բազմությունը, որը չկա։
Ամբողջ հարցը գործնական քաղաքականություն վարելու տեխնիկայի մեջ է, որից մեր քաղաքական դասը կաղում է՝ բոլորը վերլուծաբան տեսաբաններ են, զանգ կախող չկա։ Մյուս կողմից էլ չունեն պատրաստի քաղաքական կոնտենտ։ Արդյունքում սկսում են կենացներ ասել, իսկ կենացներով մարդկանց մեկ օրից ավել հրապարակում չես պահի»։