Ադրբեջանի Պաշտպանության նախարարն ընդունել է Թուրքիայի նոր ռազմական կցորդին

Սեպտեմբերի 6-ին Ադրբեջանում Թուրքիայի նորանշանակ ռազմական կցորդ, գեներալ-մայոր Սոներ Օրուչօղլուն ներկայացվել է պաշտպանության նախարար, գեներալ-գնդապետ Զաքիր Հասանովին։ Այս մասին հայտնում է Ադրբեջանի ՊՆ կայքը։

Պաշտպանության նախարարը շնորհավորել է Օրուչօղլուին երկրում ծառայության մեկնարկի կապակցությամբ և ընդգծել երկու պետությունների միջև սերտ հարաբերությունների կարևորությունը հատկապես ռազմական համագործակցության համատեքստում։ Գեներալ-գնդապետ Զ.Հասանովը երախտագիտություն է հայտնել «Հայրենական պատերազմում (հակառակորդը այսպես է անվանում 44-օրյա պատերազմը-խմբ.) եղբայրական Թուրքիայի ցուցաբերած բարոյական և քաղաքական աջակցության համար»:

Նա նաև հույս է հայտնել, որ նոր կցորդի մասնակցությամբ Թուրքիայի հետ ռազմական համագործակցությունը հաջող կզարգանա։

Սոներ Օրուչօղլուն իր հերթին ասել է, որ կներդնի բոլոր ջանքերն ադրբեջանա-թուրքական հարաբերությունների զարգացման համար, այդ թվում՝ ռազմական ոլորտում համագործակցությունը։

Հանդիպման ընթացքում կողմերը քննարկել են ռազմական և հարակից մի շարք ոլորտներում համագործակցության հեռանկարները, քննարկել նաև փոխադարձ հետաքրքրություն ներկայացնող հարցեր։

Հարկ է նաև նշել, որ Օրուչօղլուն հանդիպումներ է ունեցել Ադրբեջանի մի շարք առանցքային ռազմական գործիչների, այդ թվում՝ Գլխավոր շտաբի պետ, գեներալ-գնդապետ Քերիմ Վելիևի և ռազմածովային ուժերի հրամանատար, փոխծովակալ Սուբխան Բեքիրովի հետ։