Բռնազավթված Արցախում է մնացել նաև վերջին ամիսներին վերականգնվող Հակոբավանքը

Այս տարվա հուլիս ամսից սկսվել էր Արցախի Մարտակերտի շրջանի Քոլատակ գյուղի մոտ գտնվող Հակոբավանքի վերականգնման և բարեկարգման աշխատանքները։

Հակոբավանքի վերականգման աշխատանքները իրականացվում էին «Արցախի անվտանգության և զարգացման ճակատ» հանրային շարժման շրջանակներում՝ «Հակոբավանք վանական համալիրի վերածնունդ» ծրագրով։

Բարեգործական այս շարժումը նպատակ ուներ ոչ միայն վերականգնել Արցախի փառահեղ հոգևոր այս կոթողը, այլ նաև իրականացնել կրթական և բարեգործական մի շարք այլ ծրագրեր։

Վանքի հիմնադրման և առաջին շենքերի կառուցման ժամանակը հայտի չէ։ Արձանագրություններից ամենահինը փորագրված է մի խաչքարի պատվանդանի վրա, որը հետագայում տեղադրվել է եկեղեցու պատի մեջ որպես շինաքար և վերաբերում է 853 թվականին։

Մյուս գրավոր տեղեկությունը գտնվում է Երևանի Մաշտոցի անվան Մատենադարանի մի հիշատակարանում։

Այստեղ մագաղաթում գրված է այն մասին, որ Սուրբ Հակոբավանքի եկեղեցու կառուցողները եղել են Հասան–Ջալալի ծնողները՝ Վախտանգն ու Խորիշահը։

Հակոբավանքի կառուցման հիմնական ժամանակագրական փուլերը իրար են հաջորդում 9-րդ (գուցե և 7-րդ ) դարի սկզբներից մինչև 18-րդ դարի վերջը։

Վանական համալիրի կառույցների մեծ մասը ստեղծվել է 12-13-րդ դարերում։

Մի քանի ամիս սկսված աշխատանքների առաջին փուլով պետք է վերականգնվեր վանքի Հյուսիսային Սուրբ Աստվածածին եկեղեցին, իսկ երկրորդում՝ Արևելյան Սրբության եկեղեցին:

Երրորդ փուլում նախատեսվում էր վերականգնել գավիթն ու ճեմասրահները, ինչպես նաև վանական համալիրի տարածքում գտնվող հոգևոր եւ տնտեսական մյուս շինությունները։

Ցավոք, ինչպես Արցախում գտնվող բազմաթիվ վանքեր և հուշարձաններ, այնպես էլ Հակոբավանքը մնացել է բռնազավթված Արցախում՝ անորոշ ճակատագրով։