«Որևէ երրորդ ուժ ՀՀ որևէ տարածքի նկատմամբ վերահսկողություն չպետք է ունենա». Փաշինյան

ՀՀ-ն որևէ մեկին որևէ խոստում չի տվել այն տերմինաբանության շրջանակում, որն օգտագործվում է Թուրքիայի և Ադրբեջանի կողմից։ Այդ տերմինաբանությունը ընկալվում է ՀՀ նկատմամբ՝ որպես տարածքային որոշակի պահանջ և որպես արտատարածքային միջանցքի պահանջ,- Հանրայինի եթերում ասել է վարչապետ Նիկոլ Փաշինյանը:

«Մենք ասում ենք, որ եռակողմ հայտարարության մեջ նման բան գրված չէ, նման տերմինաբանություն չկա։ Բացեք, կարդացեք: Պատրաստ ենք բացել ճանապարհներն Ադրբեջանի և Թուրքիայի համար, բայց դա պետք է տեղի ունենա ՀՀ ինքնիշխանության, իրավազորության հիման վրա՝ հավասարության և փոխադարձության սկզբունքի հիման վրա։ Սա նշանակում է, որ որևէ երրորդ ուժ ՀՀ որևէ տարածքի նկատմամբ վերահսկողություն չպետք է ունենա»,- նշել է Փաշինյանը։