ՀԱՄԱՍ-ը հայտարարել է, որ ոչ իսրայելցի պատանդներն ազատ կարձակվեն

ՀԱՄԱՍ և Պաղեստինյան Իսլամական ջիհադ ահաբեկչական կազմակերպությունները Գազայում մոտ 200-250 պատանդ են պահում, որոնք գերեվարվել էին Իսրայելում հոկտեմբերի 7-ին սկսված հարձակման ժամանակ։

Այսպիսի հայտարարություն է արել ՀԱՄԱՍ-ի ռազմական թևի ներկայացուցիչ Աբու Ուբայդան արաբական լրատվամիջոցներին տված հարցազրույցում։ «Իսրայելական ուժերի հարվածների արդյունքում 22 առևանգվածներ են մահացել, այն առևանգվածներն, ովքեր իսրայելցի չեն, ավելի ուշ ազատ կարձակվեն»,- վստահեցրել է նա։

Ուբայդան նաև մեկնաբանել է Գազայում Իսրայելի պաշտպանության բանակի «Երկաթե սրեր» գործողությունը:

«Մենք ցանկանում ենք տեղեկացնել մեր ժողովրդին, թշնամուն և ողջ աշխարհին, որ Իսրայելի սպառնալիքները և ցամաքային մարտերը մեզ չեն վախեցնում: Մենք դրանից չենք վախենում և պատրաստ ենք դիմակայել ցանկացած ուժի: Գազան կդառնա զավթիչների գերեզմանատուն»,- սպառնացել է նա: