«Հաղթանակը մսխում ես բոլոր միջոցներով, որովհետև դարերի քո սովորածը միայն ողբի ու ցավի շուրջ համախմբվելն է եղել». Նորայր Նորիկյան

«Արդար Հայաստան» կուսակցության նախագահ Նորիկ Նորիկյանը ֆեյսբուքյան իր էջում գրել է. «Կարծես ոչինչ չի եղել, կարծես ստորացուցիչ պարտություն, հայրենիքի ու հազարավոր զավակների կորուստ չի եղել։
Կարծես անցած երեսուն տարին էլ չի եղել, ու մենք այն ամբողջությամբ ջնջելով եկել հասել ենք այսօր ու գնում ենք ԱՊԱԳԱ․․․
Այսպես հնարավոր է մի դեպքում, երբ քո հաղթանակը ոչ միայն չես սիրում, այլև մսխում ես հնարավոր ու անհնար բոլոր միջոցներով, որովհետև դարերի քո սովորածը միայն ողբի ու ցավի շուրջ համախմբվելն է եղել․․․
․․․Հայ լինելդ, տեսակդ պահելդ զգացել ես միայն տառապանքի ու ցավի մեջ, ու ինքդ երբեք չես հավատացել հաղթանակիդ վերջնական արդյունքին՝ արդարացնելով հողի ու հայրենիքի համար մինչև վերջ չպայքարելդ, մաս-մաս հանձնելդ, մաս-մաս հայրենիքդ փոքրացնելդ, մաս-մաս ինքդ քեզ հերքելդ ու վերացնելդ․․․։
․․․Եվ քանի դեռ մեր իրականության մեջ խեղվում է ամեն ինչ, քանի դեռ իրերը չեն կոչվել իրենց անուններով, քանի դեռ սուտն ու կեղծիքը, քաղաքական դաշտի այլասերումն ու մտավոր ամեն ինչ պղծելու գործընթացը շարունակվում է, քանի դեռ իրական հերոսի ու դավաճանի կերպարը ուրվագծած չէ հստակ ու անառարկելի, քանի դեռ պատասխանատվության ինտիտուտը չի գործել, ու բոլոր ժամանակների հանցագործները, որոնք մեր հայրենիքը հասցրեցին այս օրվան, պատասխան չեն տվել, ինքնամերժումի ու գահավիժման ցիկլից դուրս չենք գալու»: