«Ինովացիոն Հայաստան` սա է միակ ելքը». Վարդ Սիմոնյան

Լրագրող Վարդ Սիմոնյանը ֆեյսբուքյան իր էջում գրում է. «Անհանգստությունն ու դժգոհությունը զուտ բացասական հույզեր չեն, նոր ժամանակի տրամաբանությամբ՝ դրանք հենց առաջընթացի խթանիչներ են: Հայաստանի ամենաարժեքավոր ռեսուրսն անհանգիստ, իրերի այսօրվա դրության հետ անհաշտ մարդիկ են: Կյանքը համառորեն ապացուցեց, որ հենց դժգոհները դուրս եկան իրենց կոմֆորտ զոնաներից և ստեղծեցին այսօրվա տեխնոաշխարհը: Այսօր ոստիկանական կամ մանիպուլյատիվ զինանոցով շատ հեշտ է լռեցնել դժգոհների փողոցային պոռթկումները և սոցցանցերում մսխել, փոշիացնել բողոքական էներգիան: Իսկ լույսի արագությամբ օժտված գիտելիքը դժվար, երբեմն էլ՝ անհնար է կառավարել։ Google-ն արդեն ամեն ինչ գիտի ձեր և ուրեմն՝ ձեր երկրի մասին։ Հիմա արդեն ոչ թե դուք, այլ ինքն է գուգլում ձեզ՝ ամսական ամենաքիչը 41 միլիարդ 345 մլն անգամ՝ տիրապետելով շուրջ 25 միլիարդ վեբ ռեսուրսի: Ահա ինչով ավարտվեց Ստենֆորդի համալսար անի երկու ուսանողի՝ թեյի շուրջ ծավալված զրույցը:Միայն այն, թե ինչ եք գուգլում դուք, մատնում է՝ ով եք, ինչ ինքնություն ունեք և ձեր վզից բռնած՝ ուր կարելի է հասցնել ձեզ։
Ինովացիոն Հայաստան՝ ահա պատասխանն այն բոլոր հարցերի, որոնց մեջ խճճված, շաղված է հայկական քաղաքական միտքը:
Այսօր երկրների զարգացումը որոշվում է ՀՆԱ-ում ՏՏ-ի մասնաբաժնով, մնացած ողջ հռետորաբանությունն արդարացում է, ազգային աղյուսակներ հորինելու անհեթեթ փորձ:
Աշխարհում այլևս գիտուններ ու հաջողակներ չկան, կան ժամանակի համատեքստում և նրանից դուրս ապրող միավորներ: Նոր ժամանակը տեղակայված է ՏՏ միջավայրում և բարեկեցիկ է այն հանրությունը, որն ընդունակ է յուրացնել, ստեղծել ու փոխադրել տեղեկատվական նոր գիտելիքը: Եթե չես գնում նոր ժամանակին ընդառաջ, ամենևին էլ չի նշանակում, որ նոր ժամանակը չի գա քո ետևից, եթե անգամ թաքնվես սեփական խոհանոցում: Հեռու չէ այն օրը, երբ «խելացի» սառնարանը մեզ թույլ չի տա ուշ երեկոյան բացել նրա դուռն ու ձգվել դեպի յուղալի կերակուրը: Իրերը կկառավարեն ու կծրագրավորեն նրանց, ովքեր կզլանան սովորել թվանշային աշխարհի նոր այբուբենը, ծրագրավորման նոր լեզուն ու ռիթմը:
Քաղաքական կուսակցությունների և մտավոր ընտրախավի անունից հանդես եկող ռուսական և արևմտյան շպիոնաժը շարունակելու է բզկտել մեզ ու մեր երկիրը՝ վաճառքի հանելով ընդհուպ՝ երկրի վերջին միսնուոսկորը, եթե մեր երկրի տեղում վեր չխոյանա ԻՆՈՎԱՑԻՈՆ ՀԱՅԱՍՏԱՆԸ։
Ինովացիոն Հայաստան՝ սա է երկրի ելքը, տնտեսության, քաղաքականության, մշակույթի, Հայաստանի մարմինն ու հոգին լափող այս անավարտ /այո, ԱՆԱՎԱՐՏ/ պատերազմի ելքը»: