«Ինքն իրեն կարգել է` որպես Հայաստանի վարչապետ». Էդգար Ղազարյան

Լեհաստանում ՀՀ նախկին դեսպան, ՍԴ աշխատակազմի նախկին ղեկավար Էդգար Ղազարյանի հետ զրույցում 24TV-ի թղթակիցը հիշեցրեց. «Այսօր Ալեն Սիմոնյանն ԱԺ-ում ասաց, որ 15 օրվա ընթացքում հնարավոր է՝ խաղաղության պայմանագիրը կնքվի, եթե Բաքուն քաղաքական կամք դրսևորի: Նա նշում է, որ սկզբունքային հարցերի շուրջ համաձայնության եկել են, բայց Բաքուն բոյկոտում է տարբեր հարթակներ: Սիմոնյանը նույնիսկ առանձին երկխոսելու առաջարկ է անում: Դո՞ւք ինչ հնարավորություններ եք տեսնում՝ պայմանագիր կնքելու»:
ԱԺ-ի նախագահի կողմից նման հայտարարությունը Հայաստանում Սահմանադրական կարգի տապալման դրսևորում է, վստահեցրեց Ղազարյանը: «Արտաքին քաղաքականության հարցերը որոշում և իրագործում է գործադիր իշխանությունը: Օրենսդիր իշխանությունն այդ գործընթացին կարող է մասնակից լինել միայն այն փուլում, երբ որ կստորագրվի որևէ միջպետական համաձայնագիր, միջպետական պայմանագիր, Սահմանադրական դատարանը կքննարկի դրա համապատասխանությունը Սահմանադրությանը: Այնուհետև, նոր դա կարող է քննարկել Ազգային ժողովը և ԱԺ-ի նախագահը տեղականա դրա բովանդակության մասին: Եթե ԱԺ-ի նախագահը հիմա տեղյակ է, թե ինչ բանակցային գործընթաց է գնում, ով մեր երկրում չի հանդիսանում նույնիսկ անվտանգության խորհրդի անդամ, նշանակում է՝ նա գերազանցել է իր լիազորություններն ավելի շուտ՝ ինքն իրեն կարգել է՝ որպես Հայաստանի վարչապետ: Մենք կարող ենք նրա այսօրվա հայտարարությունն ընդունել ի գիտություն, որ ինքն իրեն ավելի բարձր է դասում, քան վարչապետը»: