«Ցնցուղի կամ ծորակի որակի համար ԿԳՄՍ նախարարը դժվար թե կարողանա հաշվետու լինել»․ Գարիկ Քեռյան

Քաղաքագետ Գարիկ Քեռյանի ֆեյսբուքյան գրառումը․ «Պետբյուջեից ֆինանսավորվող շինարարական աշխատանքների ստուգումն անձամբ վարչապետի կողմից չարաշահումները բացահայտելու և պետական միջոցների վատնումները կանխելու նպատակով ինքնին դրական եմ գնահատում: Սակայն մի իրողություն նկատեցի, որն ըստ իս պետական կառավարման անարդյունավետության կարող է բերել: Եթե նկատեցիք շրջայցերի ընթացքում որպես պատասխանատու պաշտոնյաներ վարչապետին ուղեկցում էին Տեղական ինքնակառավարման և ԿԳՄՍ նախարարները, քաղաքաշինության պետական կոմիտեի նախագահը, մարզպետը, ՊՎԾ ղեկավարը և էլի մի քանի բարձրաստիճան պաշտոնյաներ և համայնքապետեր: Այսինքն անորակ և թերություններով իրականացված շինաշխատանքների համար հինգից ավելի պետական պաշտոնյաներ պետք է պատասխան տան, իհարկե նաև շինարարական ընկերությունը: Այսպիսի պայմաններում կոնկրետ պատասխանատվությունը մնում է օդում կախված: Ճիշտը մեկ պետական մարմնի վրա պետք է դնել վերահսկողությունը և իրեն էլ համարել պատասխանատու: Ցնցուղի կամ ծորակի որակի համար կրթության և գիտության նախարարը դժվար, թե կարողանա հաշվետու լինել»։