Մեկ օրում 2 սպայի սպանություն` 2-րդ բանակային կորպուսում. ԶԼՄ

Քիչ առաջ հաղորդեցինք, որ այսօր՝ հունվարի 9-ին, հայտնաբերվել է ավագ լեյտենանտի դի:

Ողբերգական դեպքի մասին մանրամասներ է հայտնում «Հրապարակ»-ը: «Ժամերի տարբերությամբ Վարդենիսի դիրքերից մեկում սպանվել է լեյտենանտ Միքայել Դանիելյանը:

Սպանված լեյտենանտի դին առավոտյան ժամը 11-ի սահմաններում են հայտնաբերել, սակայն ճանապարհների անանցանելիության պատճառով դին ժամեր շարունակ մնացել է դիրքում, չեն կարողացել հիվանդանոց տեղափոխել:

Մեզ հայտնի դարձավ, որ Միքայելը Ամանորի գիշերը տանն է եղել՝ հարազատների միջավայրում: Ծնողները հետաքրքրվել են ծառայությունից, ասել է, որ ամեն բան լավ է, որևէ մեկի հետ խնդիր չունի»,- գրում է լրատվականը:

Առավոտյան հաղորդել էինք գիշերը տեղի ունեցած մեկ այլ սպանության մասին: Լուսադեմին Վարդենիսի դիրքերից մեկում ժամկետային զինծառայողներից մեկն իրեն կցված հրազենից մահացու կրակ էր արձակել նույն դիրքում ծառայող սպաներից մեկի վրա։