«Լքված ու թալանված տներ` Հայաստանում». Նարինե Ավետիսյան

«Լոռի» հեռուստաընկերության գլխավոր խմբագիր Նարինե Ավետիսյանի ֆեյսբուքյան գրառումը՝ կից լուսանկարներով. «Աշխատանքի բերումով Լոռու մարզի փոքր բնակավայրերում շատ եմ լինում: Նկարահանումների ժամանակ պարտադիր կանգառներ եմ ունենում լքված ու թալանված տների մոտ: Մի տեսակ կանչող բան կա: Այս զգացողությունն առաջին անգամ ունեցա Կարսում՝ Չարենցի լքված ու թալանված տանը… Ի՞նչ եմ ես զգում, երբ տեսնում եմ լքված ու թալանված տներ Հայաստանում.
Այս տները պատմություն են, հիշողություն, թանգարանի նման են, որտեղ ոչ ոք երբեք չի այցելում: Նրանք կարծես ուրվականներ լինեն, շատերը՝ մահարձաններ: Երբ մտնում եմ ներս՝ անցյալի, կանգ առած ժամանակի խոնավաբույրն է քիթս «շոյում», շունչս կտրվում է, ես հայտնվում եմ բոլորովին այլ աշխարհում: Գլուխս տակնուվրա է լինում հարցերով. «Ովքե՞ր էին ապրում այստեղ, ի՞նչ էին անում, ինչո՞ւ նրանք այլևս այստեղ չեն»… Բայց դուռը վերջինը փակողն անպիտան իրեր է թողել, որոնք վկայում են, թե որքա՜ն կյանք է եղել այս տանը:
Ես ինձ չեմ համարում հմուտ լուսանկարիչ, բայց աչքս ու զգացողությունս սիրողական չեն: Լուսանկարում եմ այն ամենը, ինչը հուզական ազդեցություն է թողնում ինձ վրա՝ տներ, մեքենաներ… Ես տարված եմ այն ամենով, ինչն անկյալ է, լքված, թալանված…
Հ.Գ. Լուսանկարներով ես ուզում եմ վերստին ապրեցնել նրանց՝ անշունչ ու անկյանք այս տներին, ուզում եմ ցույց տալ նրանց գեղեցկությունը, որը տեսնում և զգում եմ յուրաքանչյուր լուսանկարում: Ես ուզում եմ այնպես անել, որ դիտողը ունենա այն նույն զգացողությունը, ինչ ես եմ ունեցել:
Հ.Գ.1 Այս շարքը կհամալրվի պարբերաբար: Արդեն հարյուրից ավել են լուսանկարներս»: