«Կա՞ մի բան, որ դուք պատրաստ եք չզիջել և կա՞ մի բան, որ պատրաստ է զիջել Ալիևը». Աննա Գրիգորյանը՝ Փաշինյանին

«Նախընտրական խոստումներում նշվում էր «անջատում հանուն փրկության» թեզի մասին, իսկ բանակցություններում այս կառավարությունը որդեգրել էր «հանձնենք Արցախը, ստանանք կադաստրի վկայական, ապահովենք 29800-ը»: Զոհաբերեցիք Արցախը, ադրբեջանական զինված ուժերը շարունակում են կանգնած մնալ Ջերմուկում, Ներքին հանում, օկուպացված մյուս տարածքներում»,- այս մասին այսօր՝ հունվարի 17-ին, ԱԺ-ում հարցուպատասխանի ժամանակ նշեց «Հայաստան» խմբակցության պատգամավոր Աննա Գրիգորյանը:

Նա, դիմելով Նիկոլ Փաշինյանին, ասաց. «Հետո էլ ասում էիք՝ խաղաղությունը շատ մոտ է, հիմա կգնանք, կկնքենք պայմանագիր, նաև ասում էիք՝ 3 սկզբունքների շուրջ ձեռք եք բերել համաձայնություն՝ տարածքային ամբողջականություն, սահմանազատման մասին սկզբունքներ և կոմունիկացիաների ապաշրջափակում: Բայց հիմա Ալիևն ասում է՝ որտեղ կանգնել եմ, ընդհանրապես չեմ պատրաստվում դուրս գալ: Ալիևը պահանջներ է ներկայացնում, որևէ կետում զիջման չի գնում, դուք բոլոր այն հարցերը, որոնք համարում էիք կարմիր գիծ, բոլորը զիջել եք: Սահմանազատման շուրջ որևէ սկզբունքի վերաբերյալ համաձայնություն չկա, ապաշրջափակման մասին խոսք չկա: Դուք զիջում եք ամեն ինչ, Ալիևը չի զիջում ոչինչ: Ցույց տվեք մի կետ, որտեղ պատրաստ եք մինչև վերջ կանգնել ու չզիջել, և ցույց տվեք մի կետ, որտեղ Ալիևը պատրաստ է գնալ զիջման»:

Ի պատասխան Փաշինյանը դժգոհեց, որ անդադար նույն բանն են ասում, չեն հոգնո՞ւմ:

Մանրամասները՝ տեսանյութում։