«Մեր պետության ու ժողովրդի բարոյազուրկ արարքն էր՝ չհարգել սեփական կռիվը». Տաթևիկ Հայրապետյան

ԱԺ նախկին պատգամավոր, ադրբեջանագետ Տաթևիկ Հայրապետյանի ֆեյսբուքյան գրառումը․ «Բանակը մարդիկ են, ծառայություն է, անխոնջ նվիրում է, ինքնազոհություն է, պետական պաշտպանություն է, հայրենիքի հանդեպ սեր է, կռիվ է, հաղթական է, հետո կռիվ է ու կորուստ է, բայց ամենակարևորը, դա չհանձնվել է, չկոտրվել է, չկամազրկվելն է, ամենակարևորը պատրաստվել է, ուժեղանալն է, դասեր քաղելն է...: Բանակն է բոլոր ժամանակներում մեր անվտանգության ու մեր պետության լինելության թիվ մեկ երաշխավորը: Անկախ քաղաքական ղեկավարության դիրքորոշումից՝ միևնույն է՝ բանակում կան բազմաթիվ ազնիվ ու նվիրյալ սպաներ, որոնք գիտեն իրենց բաժին հասած պատասխանատվության չափը, գիտեն, որ պետք է պատրաստվել, գիտեն, որ իրենց ուսերին է դրված մեր պետության անվտանգությունը: Ուժ ու համբերություն եմ մաղթում այդ մարդկանց:
Կուզեմ այսօր ոչ միայն ուժ մաղթել բանակին ու մեր զինծառայողներին, այլև ներողություն խնդրել բոլոր այն նվիրյալներից ու նրանց ընտանիքներից, որոնց կռիվը մենք հարգել ու պահել չկարողացանք, դա մեր պետության ու ժողովրդի ամենավտանգավոր ու բարոյազուրկ արարքն էր՝ չհարգել սեփական կռիվը, չհարգել սեփական զոհողությունը...Մենք այդ էջը հաղթահարելու ու մեզ վերգտնելու խնդիր ունենք: Հույս ունեմ՝ շատ չենք ուշանա...»։