«Կամ մեր սերունդն առողջական ծանր պրոբլեմներ ունի, կամ էլ զորակոչը կոռուպցիայի միջավայր է». Փաշինյան

Բանակը պետք է դադարի լինել էժանագին կենացների օբյեկտ կամ կենացների էժան օբյեկտ, վստահեցնում է վարչապետ Փաշինյանը: «Որովհետև, երբ փորձում ես հասկանալ, թե ինչ է թաքնված այդ կենացների խորքում, առերեսվում ես դառը իրականության. զորակոչի ենթակա տարիքային խմբի կեսից քիչն է զորակոչվում բանակ: Սա կամ նշանակում է, որ մեր սերունդը առողջական ծանր պրոբլեմներ ունի, կամ էլ զորակոչը ՀՀ-ում մնում է կոռուպցիայի ամենածաղկուն միջավայրը, որտեղ միմյանց հետ դաշնակցում են բժշկական հանրության, զինվորականության և հանրության ներկայացուցիչները: Եթե այսպես է, իսկ նման հավանականություն կա, սա պետությունը քայքայող դաշինք է ու մեր պարտքն է ջարդել էդ դաշինքի ողնաշարը, որովհետև էդ դաշինքը կասկածի տակ է դնում մեր պետության գոյության իրավունքը»,- նշեց նա՝ վեր բարձրացնելով նաև իրավապահ համակարգի արդյունավետության հարցը: