Սահմանազատման հարցերով հանձնաժողովների հանդիպումը կկայանա

Հայաստանի և Ադրբեջանի միջև պետական սահմանի սահմանազատման ու սահմանագծման հարցերով երկու երկրների համապատասխան հանձնաժողովների հանդիպումը կկայանա մինչև ամսվա վերջ։ Այս մասին «Փաստինֆո»-ի հարցին ի պատասխան վստահեցրել են փոխվարչապետ Մհեր Գրիգորյանի գրասենյակից՝ նշելով, որ օրը, ժամը և վայրը դեռ հստակեցված չէ։

Հիշեցնենք, որ ավելի վաղ գրավոր հարցմանն ի պատասխան գրասենյակից հայտնել էին, որ հանդիպմանը քննարկվելու է հանձնաժողովների համատեղ գործունեության մասին կանոնակարգի նախագիծը։ Փոխվարչապետի գրասենյակից նաև հայտնել էին, որ վերոհիշյալ նախագծում պետք է սահմանվեն համատեղ աշխատանքներում օգտագործվելիք իրավական նշանակություն ունեցող փաստաթղթերի և իրավական ակտերի տեսակները և տիպերը, նույնականացվեն ԽՍՀՄ ժամանակաշրջանի վերջին տոպոգրաֆիկ քարտեզները, որոնք պատշաճ իրավական հիմքերով կազմվել և տպագրվել են իրավասու մարմինների կողմից, և այլ նմանատիպ հարցեր»:
Հիշեցնենք, որ Հայաստանի Հանրապետության և Ադրբեջանի Հանրապետության միջև պետական սահմանի սահմանազատման ու սահմանային անվտանգության հարցերով հանձնաժողովը գլխավորում է ՀՀ փոխվարչապետ Մհեր Գրիգորյանը։ Նման հանձնաժողով է ստեղծվել նաև Ադրբեջանում, որը ևս գլխավորում է այդ երկրի փոխվարչապետ Շահին Մուստաֆաևը։