«Ֆանտաստիկ է. մարդիկ «Հայաստան» անունն ապազգային են համարում». Վահագն Ալեքսանյան

ԱԺ-ում քիչ առաջ ելույթ ունեցավ ՔՊ-ական պատգամավոր Վահագն Ալեքսանյանն ու անդրադառնալով «Հայոց պատմություն» առարկան «Հայաստանի պատմություն» վերանվանելու նախագծին՝ հայտարարեց. «Բավականին երկար ժամանակ է, ինչ խոսվում է «Հայոց պատմություն» առարկան «Հայաստանի պատմություն» վերանվանելու շուրջ ու էն, ինչ տեղի է ունենում հանրային դաշտում, լակմուսի թուղթ է: ՀՀ-ում մի շարք քաղաքական, կիսաքաղաքական շրջանակներ պայքարում են Հայաստանի պատմությունը Հայաստանի պատմության անունով ներկայացնելու դեմ: Ասում են՝ առարկան Հայաստանի պատմություն վերանվանելը, դա ապազգային է. ֆանտաստիկ է ուղղակի, ժողովո՛ւրդ ջան, Հայաստան անունն ապազգային ա: Սա նշանակում ա, որ իրանց պատկերացրած ազգայինն ուղիղ հակասության մեջ ա ՀՀ-ի հետ, ու սա լավագույն ցուցիչն է նրա, որ էս մարդիկ պայքարում են ՀՀ-ի դեմ, նրա դեմ, որ ՀՀ-ն լինի պետություն, նրանց պետք ա, որ հայերը լինեն ազգ, չլինեն ժողովուրդ, որ էդ ազգը լինի ինչ-որ մի միավորի կազմում, չլինի անկախ պետություն, որովհետև անկախ պետության մեջ իրենք անելիք չունեն...»: