«Արցախի բանակը, նույնիսկ կազմալուծված վիճակում, շատ ավելի էր բանակի նման, քան ՀՀ ԶՈՒ-ն». Հայկ Խանումյան

Արցախի ՏԿԵ նախկին նախարար Հայկ Խանումյանը, 24TV-ի եթերում պատասխանելով հարցին՝ արդյո՞ք արցախցի մի քանի հազար զինծառայողների ներուժն օգտագործվում է ՀՀ-ում, ասել է․ «Արցախում հատուկ վերաբերմունք կար զինծառայության նկատմամբ, բնակչության մեծ մասը պայմանագրային զինծառայության միջով անցած էին։ Նրանց ներուժն օգտագործելը, հատկապես երբ կարիքն ունեն, կարևոր է, սակայն ես տեսնում եմ, որ ինտեգրելու քաղաքականությունը չի նպաստում սրան, մարդուն միայն պայմանագրային զինծառայող վերցնելը չէ, զուգահեռ պետք է կացարանային խնդիր լուծվի, ընտանիքի չափահաս անդամն աշխատանքով ապահովվի։ Ցավոք, Հայաստանի կառավարությունն ուղղակի փորձում է որոշակի գումար հատկացնել և համարել, որ դրանով հարց են լուծում, այնինչ ամենօրյա օպերատիվ աշխատանք պետք է լիներ, ընդհուպ ամեն 50 կամ 100 ընտանքի համար մեկ աշխատակից հատկացնելը, որը կհետևեր ընտանիքների ինտեգրվելու պրոցեսին։ Մեր սպաների մոտ կա մեծ հիասթափություն, քանի որ Արցախի ՊԲ-ի և Հայաստանի այլ զորամիավորումների մակարդակները խիստ տարբերվում են, այստեղ մարդիկ չեն կարողանում ծառայել. տարրական կարգապահությունը և տարբեր բաներ ուղղակի չեն գործում, սա լուրջ խնդիր է։ Նույնիսկ թուլացած, կազմալուծված վիճակում Արցախի ՊԲ-ը շատ ավելի էր բանակի նման, քան Հայաստանի զինված ուժերը»,- ասել է նա: