«Սարսափելի է մեր կյանքը, նույնիսկ ընտանիքի մեջ հաշտություն չկա». Բագրատ Սրբազան

Բագրատ Սրբազանն Աբովյանում դիմեց ժողովրդին․ «Մեր այս ամբողջ շարժումը, երթը մեկ նպատակ ունի՝ հասնելու Ճշմարտության հաղթանակին։

Մեր երթը հենց այդ Ճշմարտության հաղթանակը կերտելն է, որպեսզի սուտը մշակույթ չդառնա մեր կյանքում, մեր տներում չապրի, մեր դպրոցներում չապրի, մեր քաղաքներում ու գյուղերում չապրի, մեր կերակուրը չդառնա, այլ Ճշմարտությունը լինի մեզ առաջնորդողը։

Այս երթը նաև ինքնամաքրվելու առիթ է, բոլոր իմաստներով ինքնամաքրվելու՝ մեղքից, սխալներից, անպատասխանատվությունից, թշնամությունից, ատելությունից, մեր բոլոր տեսակի թունավորումներից, որոնց մեջ և որոնցով մենք ապրում ենք այսօր։

Անժխտելի է, որ այդ միջավայրում ենք ապրում, այդպես ենք ապրում, և այս երթի նպատակն է, որպեսզի հաշտություն լինի մեր ժողովրդի բոլոր շետերի մեջ։

Սարսափելի է մեր կյանքը, երբ նայում ենք դրսի հայացքով։ Նույնիսկ ընտանիքի մեջ հաշտություն չկա՝ ծնողները՝ զավակների հետ, ամուսինները՝ իրար հետ և ի՞նչ հարցով՝ հենց երկրին վերաբերող հարցերով։

Եվ մեր փափագն ու ցանկությունն է, որ մենք հաշտություն ուենանք՝ որպես մեկ ազգ, որպես մեկ ժողովուրդ, հայրենատեր ժողովուրդ, կորուստներով ուղեկցվող, բայց տառապանքը դարձնող այն ցատկահարթակը, որը մեզ անընդհատ վեր կբարձրացնի»: