«Հանձնվող դիրքերից գյուղը երևում է, ինչպես բաց ափի մեջ»․ Վահե Սարուխանյան

Լրագրող Վահե Սարուխանյանի ֆեյսբուքյան գրառումը․ «Համացանցում տարածված լուսանկարը, որտեղ երևում է Ղզլ Հաջիլի գյուղի ցուցանակը, արվել է մի վայրում, որը դիտարկվել է ու, թերևս, շարունակում է դիտարկվել հայկական հենակետերից, բայց երբեք չի եղել մեր վերահսկողության տակ: Համադրելով տարածված լուսանկարն (նկար 1) ու արբանյակային պատկերը (նկար 2)՝ կարող ենք ասել, որ լուսանկարն արվել է այս կոորդինատներում՝ 41.06578037720124, 45.17226134918248 (մի քանի մետր շեղումը չենք հաշվում);
Այս կետը ադրբեջանական մարտական հենակետերի թիկունքում է, բայց Ջողազի ջրամբարի հայկական դիրքերից դիտարկվում է:
Այստեղ հարցն այլ է: Եթե հավատանք ապրիլի 19-ի հայտարարությանը կից քարտեզին, որը տարածել էր ՀՀ ԱԳՆ-ն, ապա հայկական բանակը պետք է որ հետ քաշվի (եթե դեռ չի քաշվել) Ջողազից հարավ-արևելք ու Բերքաբերից արևելք գտնվող դիրքերից, որոնք կարևոր ռազմավարական բարձունքի (680-700 մ) վրա են և Բերքաբերի պաշտպանության առաջին գիծն են այս ուղղությամբ: Համենայն դեպս, ապրիլի 19-ի քարտեզում Բերքաբերի արևելյան ուղղությամբ սահմանազատվող գիծը գալիս է մինչև նշված հայկական հենակետ: Եթե այս բարձունքը անցնում է թշնամուն, ապա Բերքաբերը հայտնվում է 1000-1100 մ դիտարկելի հեռավորության վրա: Ճիշտ է, Ջողազի դիմացի ափի դիրքերից ևս Բերքաբերը այդքան հեռավորության վրա է, բայց հարցն այստեղ այն է, որ նոր պայմաններում հայկական գյուղը կհայտնվի բավականին մոտ բարձունքից վերահսկողության տակ, այլ կերպ ասած՝ հանձնվող դիրքերից գյուղը երևում է, ինչպես բաց ափի մեջ»: