«Բացառվում է ադրբեջանցիների վարկածը»․ վարչական ղեկավարը՝ Ակների բնակչի մահվան մասին

Հայտնել էինք, որ հուլիսի 16-ին Ակներ գյուղի բնակչի դին հայտնաբերել են գյուղի մոտակա լեռան լանջին։
«Ակներ գյուղի 62-ամյա բնակիչը անասուններին արոտ է տարել, սակայն չի վերադարձել, համագյուղացիները ավելի ուշ նրան մահացած են հայտնաբերել»,- Օրագիր Նյուզ-ի հետ զրույցում ասել է Սյունիքի մարզի Գորիս խոշորացված համայնքի Ակներ բնակավայրի վարչական ղեկավար Սպարտակ Մինասյանը։

«Մահացած տղամարդը մեր գյուղի բնակիչ է, պապական այս գյուղում են ապրել։ Շատ լավ մարդ էր, լավ ընտանիքի հայր, երեխաներ ունի, ամուսնացած են։ Ինքը զբաղվում էր անասնապահությամբ, բացի այդ նաև վարորդ էր, մեծ մեքենա ուներ։ Երեկ առավոտյան անասունները արոտ տանելու իր հերթն է եղել, տարել է գյուղից մի 4-5 կիլոմետր վերև գտնվող արոտավայրեր, այնտեղ էլ դեպքը եղել է։

Երեկոյան անասունները հետ են եկել դաշտից առանց նախրապահի։ Արդեն հասկացել են, որ մի բան այն չէ, զանգել են, չի պատասխանել։ Սկսել են ամբողջ գյուղով ման գալ։ Գիշերը 23։00-ին նոր գտել են մահացած վիճակում»,- պատմել է Ակների վարչական ղեկավարը։

Ճշտող հարցին՝ արոտավայրերը մո՞տ են թշնամու դիրքերին, հնարավո՞ր է, որ թշնամու գործողությունների հետևանքով մահացած լինի բնակիչը, Սպարտակ Մինասյանը պատասխանել է․ «Շատ մոտ չի սահմանին, բայց դիտարկվում է, սարերի վրա ադրբեջանցիներ կան, Սև լճի վերևի հատվածն է ընկնում՝ Իշխանասարի ստորոտում։ Բացառվում է ադրբեջանցիների վարկածը։ Երևի ինֆարկտ է եղել կամ ճնշում, դա կպարզաբանեն»։