«Սրանց հետ երբեք ոչինչ լավ չի եղել ու լավ չի լինելու». Նաիրի Հոխիկյան

Լրագրող Նաիրի Հոխիկյանի ֆեյսբուքյան գրառումը. «Փողոցում թե որևէ միջոցառման ժամանակ կամ հյուր գնալիս, խանութում թե շուկայում մարդիկ գրեթե ամեն քայլափոխի հարցնում են՝ ո՞նց է լինելու մեր երկրի վիճակը։ Մարդկանց աչքերում տխրություն, անհանգստություն և անորոշություն կա հայրենիքի ճակատագրի համար։
Ես միշտ ասում եմ, որ ավելի վատ ժամանակներ են եղել, բայց կարողացել ենք պատվով դուրս գալ խնդիրներից և նույնիսկ հզոր պետականություն ունենալ։ Հիմա էլ կարող ենք, եթե չկորցնենք հույսը և վճռականությունը։
Մարդկանց հաջորդ տրամաբանական հարցն է հնչում՝ բայց սրանց հե՞տ...՝ մատնացույց անելով Հայաստանի դավաճանական կառավարությանը։
Ես այստեղ կտրուկ եմ պատասխանում՝ առանց եթե-ների։ Սրանց հետ երբեք ոչինչ լավ չի եղել ու լավ չի լինելու։ Սրանք վատի, խաբելու, պարտության, դավաճանության և չարիքի կառավարություն են, հետևաբար պետք է մոռանալ սրանց հետագա քաղաքական գոյության մասին։
Մարդիկ մյուս տրամաբանական հարցն են տալիս՝ բա ո՞ւմ հետ...
Ես պատասխանում եմ, որ մեր ժողովրդի մեջ հիմա էլ կան բազում նվիրյալ, խելացի և պատրաստված գործիչներ, որոնց հետին պլան են մղում քաղաքական դաշտի ակտիվ և հաճախ մակերեսային խաղացողները։ Հայաստանը հարուստ է ուժեղ գործիչներով, որոնք շուտով իրենց խոսքը կասեն ինչպես իշխանությանը տապալելու, այնպես էլ ազգային կառավարություն կազմելու, Հայաստանը եռափուլ զարգացման ճանապարհով տանելու առումով։
Հնարավոր է ամեն լավ բան, պարզապես ժողովրդին ամեն ինչ ճիշտ և անկեղծ ներկայացնել է պետք, ժողովրդի հետ ազնիվ լինել է պետք, և ժողովուրդը կգնահատի քեզ։
Ազնվությունը քաղաքականության մեջ ամենակարևոր գործոնն է»: