««Նուբարաշեն» ՔԿՀ-ում 4-5 ամսով մարդիկ չեն կարողանում օգտվել տեսազանգի հնարավորությունից»․ Դավիթ Գյուրջյան

«Քրեակատարողական ոլորտում լուրջ խնդիրներ կան մարդու իրավունքների պաշտպանության հետ կապված։ Խնդիրները համակարգային բնույթ են կրում»,- Մեդիա կենտրոնում «Մարդու իրավունքները ճաղերի հետևում. անմարդկային պայմաններ Նուբարաշեն ՔԿՀ-ում» թեմայով քննարկման ժամանակ ասել է իրավունքի զարգացման և պաշտպանության հիմնադրամի իրավական հարցերով փորձագետ Դավիթ Գյուրջյան։ «Խնդիր կա բուժծառայության մասով, օրինակ, ահազանգ կա, որ ինչ-որ գանգատներ ներկայացնելիս՝ առանց պատշաճ ստուգման նշանակումներ են կատարվում, որոնք կա՛մ արդյունավետ չեն լինում, կա՛մ վնասակար են լինում... «Նուբարաշեն» ՔԿՀ-ում 4-5 ամիս ժամանակով մարդիկ չեն կարողանում օգտվել տեսազանգի հնարավորությունից։ Համակարգիչն ամիսներով ինչ-որ կապի խափանման կամ այլ խնդիր է ունենում: Բացի տեսազանգից, առկա է նաև զանգի հնարավորություն. օրենքով գաղտնիության պահանջ է դրված, որ խոսակցությունը չպետք է լսվի, սակայն զանգի խուցն այնպիսի կահավորանք ունի, որ բոլորին, նաև՝ անձնակազմին, լսելի է խոսակցությունը․ գաղտնիության պահանջը չի պահպանվում։ Սա այն ֆինանսը չէ, որ պետությունը չունենա։ Դատական բարեփոխումների մասերով ծրագրերից մեկում կարելի է ներառել նաև բանտային պայմանների նվազագույն բարելավումը»,- նշել է Գյուրջյանը։