«Մերի Փափազյանն ընտրվել է ԱՄՆ Հանրային Համալսարանների վարչական խորհրդի անդամ»․ Հայկարամ Նահապետյան

Լրագրող Հայկարամ Նահապետյանը ֆեյսբուքյան էջում տեղեկացնում է․ «Դր Մերի Փափազյանն ընտրվել է ԱՄՆ Հանրային Համալսարանների վարչական խորհրդի անդամ։ Այս կառույցը հիմնականում զբաղվում է ամերիկյան վետերանների կրթական հարցերով։ Տարբեր առիթներով հանդիպել եմ Դր Փափազյանին։ Երբ ղեկավարում էր Հարավային Կոնեկտիկուտի ՊետՀամալսարանը (SCSU), առանց պետբյուջեից ֆինանսավորման, Փափազյանը 200 միլիոն փող ճարեց ու էնպիսի շինարարություն արեց, որ լաբորատոր հագեցվածությամբ SCSU-ն որոշ պարամետրերով գերազանցեց ընդամենը մի քանի կմ այն կողմ գտնվող Եյլի հռչակավոր համալսարանի լաբորատորիաները։ Yale-ը պատմականորեն ամերիկյան հնագույն և լավագույն ԲՈՒՀերից մեկն է, բայց Փափազյանը շատ մեծ ներդրում արեց, որ SCSU-ն հռչակավոր Yale-ի մրցակիցը դարձավ տեխնոլոգիական որոշ չափորոշիչներով: Նրա շնորհիվ SCSU-ն ու Երևանի Մանկավարժականը պայմանագիր ստորագրեցին ու փոխայցեր եղան։
Հետո Փափազյանը նշանակվեց Սան Խոսեի համալսարանի ռեկտոր, որը Սիլիկոնային Հովտի հիմնական համալսարանն է։ Փափազյանը նաև ԱՄՆ Համալսարանների և Քոլեջների վարչական խորհրդների ընդհանուր միության փոխնախագահն է։ Mary A. Papazian-ի անվան «A» միջանկյալ տառն ի դեպ նշանակում է Արշակունի։ Դա Դր Փափազյանի աղջկական ազգանունն է։
Դր Փափազյանը բարձր կարգի մասնագետ է, բազմիցս այցելել է ՀՀ և պատմական Կիլիկիա»։