«Մզկիթ դարձած եկեղեցիները միշտ ծանր տպավորություն են թողնում»․ Կարինե Փանոսյան

Զբոսավար Կարինե Փանոսյանի ֆեյսբուքյան գրառումը՝ կից լուսանկարներով․ «Մզկիթ դարձած եկեղեցիները միշտ ծանր տպավորություն են թողնում։ Կարծես՝ սիրտը պոկած, մարմնի մեջ ատելի մեկի սիրտը խցկած օրգանիզմ լինեն։
Տարսոն քաղաքում է գտնվում Սբ. Պողոս Առաքյալի անունը կրող եկեղեցին։ Հիմնադրվել է, հավանաբար, 4-րդ դարում։
Ասում են, որ հենց այստեղ է 1198 թ-ին թագադրվել Լևոն II արքան։
Իհարկե, հրաշալի բազլիկ է եղել նախկինում։ Երևակայությունս կարող է պատկերել, թե ինչ գորգեր, վարագույրներ ու ջահեր են զարդարել կամարազարդ ներսույթը, որքան ճոխ է եղել, հավանաբար, խորանը, որը վաղուց ջնջվել է բարբարոսի ձեռքով։
Այսօր մտնողը կոշիկները հանում է մուտքի մոտ, ու քրիստոնեական անցյալի հովանու ներքո աղոթում մահմեդական Աստծուն։
Իսկ մի ժամանակ այստեղ վեհ ու փառավոր ծեսը արարվել է հզորության ու հարատևության հույսով»։