«Տաթևիկ Գրիգորյանին փնովելուց առաջ հիշենք նրա՝ անկախ լինելու օրինակներ». Րաֆֆի Ասլանյան

Փաստաբան Րաֆֆի Ասլանյանի ֆեյսբուքյան գրառումը. «ՀՀ անաչառ դատավորներից Տաթևիկ Գրիգորյանին փնովելուց առաջ նախ եկեք հիշենք նրա՝ անկախ, գրագետ լինելու բազմաթիվ օրինակներ։ Նույնիսկ բավարար է հիշել, թե ինչպիսի համարձակությամբ, «հեղափոխություն» կոչվածի հաղթանակի, նոր իշխանության պաշտոնավարման, համատարած էյֆորիայի ու քծնանքի առաջին օրերին ինչպես դատավոր Գրիգորյանը չբավարարեց Մասիսի քաղաքապետ Դավիթ Համբարձումյանին կալանավորելու վերաբերյալ միջնորդությունը՝ ցուցարարների նկատմամբ բռնություն կիրառելու ենթադրյալ մեղադրանքով, երբ դատարանի բակում հավաքվել էին բազմահազար ցուցարարներ, դատավորի վրա գործադրվում էր սարսափելի ճնշում։ Այդ ժամանակ ինքս զբաղեցնում էի Երևան քաղաքի դատախազի պաշտոնը, այսինքն մեղադրանքի կողմի վերադաս պաշտոնյա էի, սակայն դատավորի այդպիսի անկաշկանդ, համարձակ վարքագիծն, անկախ ամեն ինչից, ինձ հիացմունք պատճառեց։
Ինչ վերաբերում է Հրայր Թովմասյանի վերաբերյալ գործին, ապա չեմ բացառում, որ դատավարական խնդիրներ կան, ինչը գուցե քրեադատավարական փոխհարաբերությունները անձնավորելու արդյունք լինի, քանի որ երբեմն այդպես պատահում է։ Սակայն նշվածը հիմք չի կարող հանդիսանալ դատավոր Տաթևիկ Գրիգորյանի մասնագիտական ու հատկապես կամային որակները կասկածի տակ դնելու համար»։