«Մթի ու ցրտի տարիները հիշում են, հաղթանակը՝ ոչ»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը․ «Երևանում էլեկտրաէներգիայի անջատումների հետ կապված մարդիկ արդարացիորեն բողոքում են, բայց անարդար կերպով հիշում ու հիշեցնում «մթի ու ցրտի" տարիները:
Մթի ու ցրտի տարիները, որոնք ճշգրտությամբ համընկան Արցախյան հաղթանակի հետ, մարդիկ հիշում են, բայց չեն հիշում հաղթանակը:
Մթի ու ցրտի տարիների մասին խոսույթը քաղաքական օրակարգ բերեց 1998 թվականին Հայաստանում ռազմապետական և հակապետական հեղաշրջում իրականացրած խունտան:
Այս անբարո ապերախտության երկրորդ մասն այն էր, որ ՀՀ իշխանությունները (1990-1998) կապ չունեն Արցախյան հաղթանակի հետ, այլ այն կերտել են Քոչարյանն ու Սերժը և կուսակցական ջոկատները, իսկ Լևոնը դավաճան էր և հողերն ուզում էր հետ տալ, մենք փրկեցինք երկիրը:
Ասում եք, որ Նիկոլն է հողերը տվել, ինչպես Լևոնն էր ուզում տալ, իսկ դուք փրկեցիք երկիրը:
Բա այս անգամ էլ փրկեիք:
Մի այլ խոսույթ, ոչ պակաս անբարո, շրջանառության մեջ են դրել այսօրվա իշխանությունները: Ի՜նչ հաղթանակ, ի՜նչ բան, 1991 թվականի Ալմաթին է ու վերջ:
Մենք վճարում ենք մեր ուրացման ու պատմությունը կեղծելու գինը:
Թուրքն ու ադրբեջանցին այնպես անբարո կերպով չի կեղծում մեր ոչ վաղ անցյալի պատմությունը, ինչպես դուք»: