«Ադրբեջանցիները ոչնչացնում են Արծվաշենի լճի ֆաունան»․ Կարեն Հեքիմյան

Հասարակական գործիչ Կարեն Հեքիմյանը ֆեյսբուքյան իր էջում գրել է․ «Ըստ օպերատիվ տեղեկությունների, ադրբեջանցիներն Ադրբեջանի բարձրագույն իշխանության թողտվությամբ սկսել են վայրենաբար ոչնչացնել Արծվաշենի լճի ֆաունան:
Խոսում են տասնյակ հազարավոր ձկների լճից դուրսբերման, տեղափոխման և սպանդի մասին:
Ասում են, որ ժամանակին ձկներով հարուստ Արծվաշենի լճում գրեթե ձուկ չի մնացել:
Ակամա մտաբերեցի ադրբեջանցի «բնապահպաններին», որոնք «մտահոգված էին» Արցախում «բնապահպանական աղետով» և փակել էին Լաչինի միջանցքը:
Ակամա հիշեցի Ալիևին և Էրդողանին, որոնք «բնապահպանական» նկատառումներից պարբերաբար պահանջում են փակել Մեծամորի ատոմակայանը և չշահագործել ՀՀ միջազգայնորեն ճանաչված տարածքում գտնվող հանքավայրերը:
Եվ, ո՞վ գիտի, միգուցե շատ շուտով պաշտոնական Բաքուն կամ Անկարան, ելնելով բացառապես «բնապահպանական նկատառումներից», պահանջի դադարեցնել Սևանից սիգի և իշխանի որսը:
Չգիտեմ, թե վերջն ինչ կլինի, սակայն այսօր ՀՀ միջազգայնորեն ճանաչված և անբաժանելի մաս կազմող Արծվաշենում բնապահպանական աղետ է՝ ադրբեջանցիները ոչնչացնում են Արծվաշենի լճի ֆաունան»։