Սերոբ Գասպարյանը ցուցմունք է տվել. «Հրապարակ»

«Հրապարակ»-ը գրում է. ««Սև հովազ» ռազմահայրենասիրական ՀԿ նախագահ, արցախյան պատերազմների մասնակից Սերոբ Գասպարյանը, որը մեղադրվում է իշխանությունը զավթելու փորձի մեջ և կալանավորված է, մեր տեղեկություններով, հարցաքննվել է և հերքել իրեն մեղսագրվողը։ Օրեր առաջ, հիշեցնենք, Քննչական կոմիտեն հայտնեց, թե ԱԱԾ-ի հետ համատեղ իշխանության յուրացման նախապատրաստության գործ են բացահայտել, մեղադրանք է առաջադրվել 7 քաղաքացու, 3-ը կալանավորված է, 4-ը՝ հետախուզման մեջ։ Խումբը, ըստ ՔԿ-ի, կապ է ունեցել Ռուսաստանի հետ, մասնավորապես հավաքագրել է մարդկանց՝ 220 հազար ռուսական ռուբլու դիմաց, ՌԴ-ի տարածքում՝ Դոնի Ռոստովում, եռամսյա հավաքների մասնակցելու, դրա ընթացքում նոր ծանր զինատեսակների հետ ծանոթանալու, ստացած գիտելիքներն այլ անձանց փոխանցելու համար։ Ինչ-որ մարդիկ ռազմական պատրաստություն անցնողներին ասել են, որ «վարժանքների նպատակը ՀՀ վերադառնալն ու գործող իշխանությանը հեռացնելն է, Հայաստանը մաքրելն ու փրկելը»:
Ենթադրյալ իշխանազավթման մասին նման բան ասողները, ճիշտ է՝ հետագայում հերքել են, որ նման բան չկա, սակայն ԱԱԾ-ն կարծում է, որ դա «կեղծ հերքում» է եղել՝ ավելի արժանահավատ է սկզբում ասվածը, ինչի հիման վրա էլ քրգործ են հարուցել: Ավելի վաղ հայտնել էինք, որ գործով կալանավորվածներից մեկը «Սև հովազ» ՌՀ ՀԿ նախագահ, արցախյան պատերազմների մասնակից Սերոբ Գասպարյանն է։ Նրա պաշտպան Էրիկ Ալեքսանյանը հայտնեց, որ Գասպարյանն իրեն ներկայացված մեղադրանքը չի ընդունում։ Նրա նկատմամբ խափանման միջոց է ընտրվել 2-ամսյա կալանքը։ Պաշտպանական խումբը պատրաստվում է վերաքննիչ բողոք ներկայացնել։ «Բողոքը կմուտքագրվի վաղը, և կտեսնենք, թե Վերաքննիչ քրեական դատարանում ինչ արդյունք կարող ենք ունենալ։ Առերևույթ նյութերի ուսումնասիրության արդյունքում պարզ է դառնում, որ բացակայում է անգամ հիմնավոր կասկածը։ Այստեղ պետք է շեշտը դնել ոչ թե նրա վրա, որ կալանքի կիրառման անհրաժեշտությունը չկա, այլ նաև վերագրվող արարքի առնչությունը հիմնավորող նյութերն անգամ հիմնավոր կասկածի նվազագույն շեմը չեն հաղթահարում։ Սերոբ Գասպարյանը, բնականաբար, մեղադրանքը չի ընդունում։ Ցուցմունք է տվել ու իր դիրքորոշումը դրա վերաբերյալ հայտնել է։ Նախաքննական գաղտնիքից ելնելով՝ չեմ կարող մանրամասներ հայտնել։ Մեղադրանքը միանշանակ իրավաչափ չէ, որովհետև այն նյութերը, որ տրամադրվել են պաշտպանական կողմին, հիմնավոր կասկածի շեմը չեն հաղթահարում»,- ասաց Ալեքսանյանը»:
Մանրամասները՝ թերթի համարում: