«Արցախի Հանրապետությունը Հայաստանում պետք է լինի լիարժեք՝ իր օրենսդիր ու գործադիր մարմիններով»․ Արցախի թեմի առաջնորդ

«Մեր արժանապատվությունը և համայն հայության խաչն այսօր Արցախն է, որը գերեվարված է»,- «Եռաբլուր» պանթեոնում, «Արցախի կանչը» հուշակոթողի հիմնարկեքի արարողության ժամանակ, ասաց Արցախի թեմի առաջնորդ Գերաշնորհ տեր Վրթանես եպիսկոպոս Աբրահամյանը: «Ինքներդ մտածեք, թե ինչ է այսօր պետք՝ Արցախը գերությունից ազատելու համար, որպեսզի նորից վերականգվի մեր արժանապատվությունը: Իմ թիկունքին երկու դրոշ է՝ Հայաստանի Հանրապետության ու Արցախի: Մենք ամեն ինչ պետք է անենք, որ Արցախի Հանրապետությունը ոչ միայն գոյություն ունենա, այլև կարողանա իրապես իրականացնել իր առաքելությունը: Ամեն ինչ պետք է անենք, որ Արցախի Հանրապետությունը Հայաստանում լինի լիարժեք՝ իր օրենսդիր ու գործադիր բոլոր մարմիններով: Արցախը պետք է տեսանելի լինի և՛ Սփյուռքի, և՛ միջազգային բոլոր կառույցների համար»,- ասաց Վրթանես եպիսկոպոս Աբրահամյանը: