«Մեր ներկայացրած հաղորդումը մնացել է անհետևանք». ԻՔՄ

«Իրազեկ քաղաքացիների միավորումը» սույն թվականի մայիսի 24-ին դատախազություն էր ներկայացրել հանցագործության հաղորդում՝ հայտնելով առերևույթ արցախահայերի դեմ ուղղված՝ «Tereza Asatryan» անունով ֆեյսբուքյան օգտատիրոջ կողմից տարածվող ատելության խոսքի մասին:

«Մասնավորապես, ԻՔՄ հաղորդման մեջ նշվում էր, որ «Tereza Asatryan» (Թերեզա Ասատրյան, ըստ որոշ լուրերի՝ անձնագրով՝ Սարգսյան, լրագրող, նախկինում՝ դատապարտված) օգտատիրոջ կողմից տարածված հաղորդագրությունը ենթադրաբար ուղղված է արցախահայերի և նրանց ընտանիքների անդամների իրավունքների դեմ, նա հանրային կերպով, սոցիալական ցանցի օգտագործմամբ, տարածում է գաղափարներ, որոնցով ատելություն, խտրականություն, անհանդուրժողականություն և թշնամանք է քարոզում ընդդեմ արցախահայերի։

ԻՔՄ կարծիքով՝ վերոնշյալ օգտատիրոջ արարքը պարունակում է ՀՀ քրեական օրենսգրքի 329-րդ, 330-րդ հոդվածներով, ինչպես նաև 136-րդ հոդվածով նախատեսված հանցագործությունների հատկանիշները (ատելության խոսք, ցեղասպանությունը կամ մարդկայնության դեմ ուղղված հանցագործությունները հրապարակայնորեն հերքելը, արդարացնելը, դրանք քարոզելը կամ դրանց վտանգավորությունը նսեմացնելը, եթե դա կատարվել է ռասայական պատկանելության, մաշկի գույնի, ազգային կամ էթնիկ ծագման կամ կրոնական պատկանելության հիման վրա՝ անձի կամ անձանց խմբի նկատմամբ ատելություն, խտրականություն կամ բռնություն հրահրելու նպատակով):

ԻՔՄ կողմից ներկայացված հաղորդումը, սակայն, մնացել է անհետևանք․ դրան ընթացք չի տրվել Քննչական կոմիտեի կողմից։ Կազմակերպությունը ներկայացրել է բողոք Գլխավոր դատախազություն, սակայն դատախազը ևս իրավական գնահատական չի տվել վերը ներկայացված փաստերին։

Մեր կողմից քննիչի և դատախազի ակտերը սեպտեմբերի 20-ին բողոքարկվել են Երևանի քրեական դատարան»,- ասվում է միավորման հայտարարության մեջ: