«Ղարաբաղի հարցը մեր վզին քցած թոկի պես են օգտագործել, որ Հայաստանի վզից քաշեն, մի մոտիկ տեղից կապեն». Նիկոլ Փաշինյան

«Հայաստան» խմբակցության պատգամավոր Քրիստինե Վարդանյանն այսօր՝ հոկտեմբերի 2-ին, Կառավարության հետ հարցուպատասխանի ընթացքում ձայնագրություն միացրեց, որտեղ Նիկոլ Փաշինյանը խոսում էր Արցախի և Հայաստանի հարցում փոխզիջման անհնարինության մասին: Այնուհետև պատգամավորը Փաշինյանին հարցրեց. «Դուք խոսում էիք փոխզիջման անհնարինության մասին, այնինչ հիմա մի բան էլ առաջ անցաք, ասում եք, որ ձեր նպատակն այն է, որ Ադրբեջանը ոչ մի զիջում չանի:

Հիմա ուզում եմ անդրադառնաք այն կետին, որը, ըստ Ձեզ, չի համաձայնեցվել, որովհետև ՄԱԿ-ի ամբիոնում Ջեյհուն Բայրամովը խոսում էր ռևանշիզմի բացառման մասին, խոսում էր փախստականների վերադարձի մասին, արդյո՞ք այդ չհամաձայնեցված կետը վերաբերում էր նշվածներից մեկին»,- վարչապետին հարց ուղղեց պատգամավորը։
«Անդրադառնամ Եռաբլուր իմ այցելության օրն իմ արած գրառմանը: Ես խնդրին անդրադարձել եմ 1996 թվականից սկսած գործընթացներից: Ինչ-որ այդտեղ ասել եմ, ճիշտ եմ ասել: Նաև էդ ա պատճառը, որ գործնականում այդ փոխզիջումները տեղի չեն ունեցել, ինչը հանգեցրել է պատերազմի։ Բայց ո՞րն է հարցի էությունը․ այս ամբիոնից ես մի քանի անգամ ասել եմ, որ Ղարաբաղի հարցը... Հիշո՞ւմ եք էն թոկի պատմությունը. հենց իր էության մեջ «թոկի ձևով Հայաստանի վզին գցած պարանի» գործառույթով են օգտագործել շատ երկրներ: Այն փոխղիջումները, որ դրված են եղել սեղանին 2016 թվականի օգոստոսից՝ դրանց բովանդակությունը եղել է հետևյալը, որ Հայաստանի Հանրապետություն պետք է գոյություն չունենա: Որովհետև այդ փաթեթը նրա մասին է եղել, որ Հայաստանի վզին քցած պարանը պետք է ձգել և մի մոտիկ տեղից կապել: Ես էդ նկատի ունեմ, որ ասում եմ՝ մենք պետություն ունենալու շանս ենք ստացել: Բա էդ ո՞նց ենք երկիր կապիտուլացրել, եթե էդ «կապիտուլացված երկրում ընտրություններ են տեղի ունեցել, դուք էլ մանդատ եք ստացել, եկել, ըտեղ նստել եք»,- պատասխանեց Փաշինյանը:

Քրիստինե Վարդանյանն էլ հանդիմանեց՝ պետք չէ ամեն անցանկալի հարցից ափերից դուրս գալ, խոսել ամեն ինչից, բացի իմ կոնկրետ հարցից:

«Ձեր կոնկրետ հարցը գրեք գրավոր մի նախադասության մեջ, ես կանդրադառնամ»,- հայտարարեց Փաշինյանը՝ այդպես էլ չպատասխանելով փախստականների վերաբերյալ հարցին: