Նոր մանրամասներ՝ 5-րդ կորպուսի հրամանատարի ազատումից. «Ժողովուրդ»

«Ժողովուրդ» օրաթերթը գրում է. «Մեզ հասած բացառիկ տեղեկությունների համաձայն՝ 5-րդ կորպուսի հրամանատարի պաշտոնից վերջերս ազատված Սասուն Բադասյանի ազատման պատճառը եղել է այն, որ նա ատեստավորման քննությունների ժամանակ իր մերձավոր զինծառայողի գնահատականը փորձել է բարելավել: Տեղեկությունը հասել է նաև պաշտպանության նախարար Սուրեն Պապիկյանին, որն էլ իր հերթին որոշել է պատժել կորպուսի հրամանատարին՝ հովանավորչության և ատեստավորման գործընթացի անաչառությանը հարված հասցնելու համար:
Մեր աղբյուրը նաև նշեց, որ այլ շրջանակներում Սասուն Բադասյանի ազատման պատճառ է նշվում ակադեմիայում ուսումնառության գնալու հանգամանքը, սակայն իրական պատճառը եղել է հենց մեզ հասած տեղեկությունը:
Մեզ լուրեր են հասել նաև, որ կորպուսի հրամանատարի նկատմամբ այդ կապակցությամբ հարուցվել է քրեական գործ:

«Ժողովուրդ» օրաթերթը փորձեց գտնել հրամանատարին, սակայն փորձերն անցան ապարդյուն. արձագանքի դեպքում պատրաստ ենք հրապարակել նաև վերջինիս մեկնաբանությունը»։

Մանրամասները՝ թերթի համարում: