«Դիվերսիոն խմբի ներթափանցման լուրերը սուտ են». Արավուսի նախկին գյուղապետ

Սյունիքի մարզի Տեղ-Արավուս գյուղերի ձորակի ուղղությամբ ադրբեջանական դիվերսիոն-հետախուզական խմբի ներթափանցման դեպք չի եղել, համացանցում տարածված լուրերը սուտ են։ «Փաստինֆո»-ի հետ զրույցում ասել է Արավուս համայնքի նախկին համայնքապետ, Տեղ խոշորացված համայնքի ավագանու ընդդիմադիր անդամ Արգամ Հովսեփյանը։

«Այդ հատվածը մեր ձորում է, սրբավայր է, խաչ է դրված, որտեղ մատաղ անելու սովորություն ունենք»,- ասել է Ա.Հովսեփյանն ու նշել, որ երևի այդտեղ մի խմած մարդ է եղել, մի նկար է թեքվել, մարդիկ գնացել են, հաց են կերել, մեկը տեսել է, որ նկարը թեքվել է ու այդպես տարածել են։
Ինչ վերաբերում է Տեղ գյուղի հատվածում ադրբեջանական կողմի իրականացվող գործողություններին, ապա Հովսեփյանն ասաց, որ և՛ մեր կողմում, և՛ իրենց կողմում ինժեներական աշխատանքներ են կատարվում՝ պաշտպանական առումով։