«Լրագրողական էթիկայի ոլորտում օրենսդրական սահմանափակումները լավագույն լուծումները չեն». Ավետ Պողոսյան

«Էթիկան այն ոլորտն է, որտեղ, չեմ կարծում, թե օրենսդրական սահմանափակումները և կարգավորումները լավագույն լուծումներին են բերում»,- այս մասին ԱԺ նիստում նշեց Հեռուստատեսության և ռադիոյի հանձնաժողովի անդամի թեկնածու Ավետ Պողոսյանը՝ պատասխանելով «Քաղաքացիական պայմանագիր» խմբակցության պատգամավոր Սերգեյ Բագրատյանի դիտարկմանը, թե բազմաթիվ են դեպքերը, երբ չեն պահպանվում լրագրողական էթիկայի կանոնները, օրենսդրական նախաձեռնությունների միջոցով հնարավո՞ր է հասնել նրան, որ լրատվությունը լինի ճշմարտացի և օբյեկտիվ, որը կբավարարի նաև հանրության շահերը:

«Շատ հաճախ անբարեխիղճ լրագրողները չեն առաջնորդվում օրենսդրական սահմանափակումներով: Ես կարծում եմ, որ ոչ օրենսդրական մոդելներն ավելի կիրառելի են. օրինակ՝ եթե մենք պնդում ենք, և դա ընդունելի փաստ է, որ լրագրողը կամ լրատվամիջոցը հաճախ կեղծ տեղեկություն է տարածում, մանիպուլյացիաներով է զբաղվում, կիսաճշմարտություններ է ասում, դրա արդյունքում կձևավորվի մի այնպիսի ռեյտինգ, որ նույնիսկ լրագրողները չեն ուզենա այդ լրատվամիջոցում աշխատել, այդ աշխատաոճը կիրառել. սա ամենաբնական պրակտիկան է, որը կայացած դեմոկրատական հասարակություններում առկա է: Կարծում եմ՝ էթիկայի տեսանկյունից այսպիսի մոդելների պետք է գնանք, և այդտեղ մեծ է ոչ թե պետության, օրենսդիրի դերը, այլ հասարակության ճշմարտության որոնման ձգտումը»,- նշեց Պողոսյանը: