«Ազգային պետությունը չի խզում կապերը սփյուռքահայ կառույցների հետ». «ՀայաՔվե»

«ՀայաՔվե»-ն ֆեյսբուքյան էջում գրում է․ «Ազգային պետությունը կոչված է աշխարհում առաջ մղելու հայկական ազգային շահը, այսինքն՝ դաշնակիցների, բարեկամների, չեզոք երկրների և հակառակորդների հետ հարաբերություններում առաջնորդվելու բացառապես ազգային և պետական շահով։
Ազգային պետությունը ողջ հայության պետությունն է։ Հայաստանի Հանրապետությունը միայն իր քաղաքացիների պետությունը չէ։ Հայաստանի Հանրապետությունը բոլոր այն հայերինն է, ովքեր կարևոր են համարում իրենց հայ լինելը և գիտակցում են, որ Հայաստանի Հանրապետությունը մեծ դեր ու անելիք ունի իրենց հայ պահելու, իրենց իրավունքներն աշխարհի տարբեր ծայրերում պաշտպանելու հարցում։ Եվ բոլոր հայերը, ովքեր գիտակցում են սա, պիտի պատրաստ լինեն ծառայություն մատուցելու իրենց հայրենի պետությանը։
Ազգային պետությունն այն է, որը կարողանում է արդյունավետ կազմակերպել այս հարաբերությունները, կազմակերպել հայ համայնքներին, ոտքի հանել նրանց ազգային սպառնալիքների ժամանակ և ներգրավել նրանց երկրի պաշտպանության, պետականաշինության ու զարգացման գործերում։
Ազգային պետությունը չի խզում կապերը սփյուռքահայ կառույցների հետ, կուսակցական տարբերություններ չի դնում»։