«Ինչո՞վ է պայմանավորված, որ Կառավարությունը հարկային օրենսգրքի փոփոխությունը համարել է անհետաձգելի». Էդգար Ղազարյան

«Ցանկացած հարկային օրենսդրության փոփոխություն առնվազն մեկ տարի ժամանակ պետք է տա տնտեսվարող սուբյեկտներին, որպեսզի իրենք իրենց բիզնեսը պլանավորեն և նախապատրաստվեն նոր հարկային ռեժիմին անցնելուն»,-ՀՀ հարկային օրենսգրքում փոփոխություններ կատարելու վերաբերյալ խորհրդարանական լսումների ժամանակ նշեց հասարակական-քաղաքական գործիչ Էդգար Ղազարյանը՝ հարց ուղղելով ՀՀ ֆինանսների փոխնախարար Արման Պողոսյանին. «Ինչո՞վ է պայմանավորված շտապողականությունը, որ Կառավարությունը հարկային օրենսգրքի փոփոխության նախագծի ընդունումը համարել է անհետաձգելի: Կառավարության նիստում սենց կարևորություն ունեցող էդ հարցը զեկուցվող է եղե՞լ, թե՞ չէ: Որովհետև Կառավարության նիստում զեկուցվում են խմիչքների անվանումները, կամ՝ թթվասերը մսից ա պատրաստված, թե կաթից»:

Արման Պողոսյանը պատասխանեց, որ զեկուցվող է եղել և անհետաձգելի է համարվել այն տրամաբանությամբ, «որպեսզի հնարավոր լինի առաջին ընթերցումը կազմակերպել ընթացիկ տարվա ընթացքում, այնուհետև ունենալ բավարար ժամանակ՝ մասնակցային քննարկումը շարունակելու համար: Մեկ տարին ձեր գնահատականն ու առաջարկն է, այդպիսի կանոն չկա»: