«Մեր մեջ արմատանում են սովորություններ, որոնք քրիստոնեավայել չեն». Տեր Միքայել քահանա Նուրիջանյան

Տեր Միքայել քահանա Նուրիջանյանը գրում է. «Սիրելիներ, ցավոք սրտի մեր մեջ արմատանում են սովորություններ, որոնք քրիստոնեավայել չեն, հատկապես հարբեցողությունը տարբեր առիթների հետ կապված:
Մեկին Աստված զավակ է պարգևում, փոխարենը շնորհակալ լինի և իր երախտագիտությունն աղոթքով, բարի գործերով, աղքատների նկատմամբ ողորմած կամք արտահայտելով դրսևորի, ինչպես Տերն է իր նկատմամբ ողորմած եղել և զավակ պարգևել, հավաքում է ընկերներին՝ նշելու այդ ուրախությունը, բայց այնքան են ալկոհոլ օգտագործում, որ վերածվում է հարբեցողության՝ դառնալով սովորություն հաջորդ բոլոր տարեդարձերի կամ առիթների ժամանակ: Նշել ուրախությունը չի արգելվում, բայց վերածել հեթանոսավայել կարգավիճակի, առնվազն լավ չի:
Հարբեցողությամբ են զբաղվում նաև հոգեհացերի ժամանակ, մոռանալով աղոթքը ննջեցյալի համար, վերածում են հոգեհացը կերուխումի և անհամ կատակների:
Հարբեցողություն են դառնում նաև հարսանյաց հանդեսները և մկրտության համար կազմակերպվող միջոցառումները, եկեղեցում Սուրբ Պսակի և Սուրբ Մկրտության արարողությանը մեծավմասամբ նույնիսկ եկեղեցի չեն մտնում տղամարդիկ, այլ դրսում ծխում են, այսինքն այդ զույգի կամ մկրտվողի համար աղոթք անող միայն մնում է քահանան ու կանայք և երեխաները, եթե, իհարկե, աղոթք են անում:
Բոլոր ուրախություններն Աստծով են ճշմարիտ ուրախություն դառնում:
Մի խոսքով, սիրելիներ, Պողոս Առաքյալն ասում է, որ հարբեցողները երկնքի արքայություն չեն մտնելու:
Ուշադիր եղեք ձեր կյանքերի և հոգու փրկության համար»: