Մանրամասներ` Վանաձորում գազալցակայանի պայթյունից

Ինչպես հայտնել ենք, այսօր՝ նոյեմբերի 29-ին, պայթյուն և խոշոր հրդեհ է տեղի ունեցել Լոռու մարզում։ Ժամը 20:20-ի սահմաններում ՀՀ Ներքին գործերի նախարարության Փրկարար ծառայության 911 ճգնաժամային կառավարման ազգային կենտրոն ահազանգ է ստացվել, որ Վանաձոր քաղաքի Խնձորուտ թաղամասում՝ Երևանյան փողոցում՝ Վանաձոր-Դիլիջան ավտոճանապարհին գործող գազալցակայանում, դեռևս անհայտ հանգամանքներում պայթյուն է տեղի ունեցել՝ հրդեհի բռնկմամբ։ Ինչպես հայտնում է ֆոտոլրագրող Գագիկ Շամշյանը, այս պահին պարեկները սահմանազատել են տարածքը, կրակն ու ծուխն էլ տեսանելի են մոտ 1 կմ-ից։ Ֆոտոլրագրողի տեղեկություններով՝ հրդեհի հետևանքով 1 հոգի տեղափոխվել է «Վանաձոր» բժշկական կենտրոն։