«Փաշինյանը հային պատմության դատաստանի առջև է կանգնեցնում». Նարեկ Գալստյան

Լրագրող, հասարակական գործիչ Նարեկ Գալստյանի ֆեյսբուքյան գրառումը. «Փաշինյանը երեկ խորհրդարանում արեց հերթական հայտարարությունը, որով ևս մեկ անգամ տարածաշրջանում առկա բոլոր խնդիրների համար մեղավոր կարգեց հայ ժողովրդին։ Պարզվում է, որ Հայաստանից մարդիկ դուրս են եկել մեր երկրի վարած արտաքին քաղաքականության ու «միջավայրի հետ կոնֆլիկտային հարաբերությունների» պատճառով, իսկ այ Արցախի հարցում իր վարած վերջին երկու տարիների քաղաքականությունը հնարավորություն է տվել գոնե միջնաժամկետ հեռանկարում պահպանել «հայկական պետականությունը»։
Չպետք է հոգնել ու պատասխանել Փաշինյանի այս զարհուրելի թեզին, որով տարածաշրջանում առկա բոլոր խնդիրների, սպանությունների, զոհերի, վեճերի հիմնական ու միակ մեղավոր է կարգվում հայը։ Նորից, Հայաստանի Հանրապետության վարչապետը, մեր երկրի ղեկավարն ասում է, որ տարածաշրջանում առկա բոլոր խնդիրների մեղավորը, սկզբնապատճառը հայն է։ Ո՛չ Ադրբեջանը, որ սկսեց Սումգայիթում ու Բաքվում հայկական պոգրոմները, ո՛չ Ադրբեջանը, որ Մարաղայում գլխատեց, սպանեց ու բռնաբարեց, այլ ինքնապաշտպանության դիմած ու սեփական կյանքը պաշտպանած հայը։ Փաշինյանը հային պատմության դատաստանի առջև է կանգնեցնում, նրան դարձնում հանցագործ, որպեսզի արդարացնի, մաքրի, լեգիտիմացնի իր գործողությունները, որի հետևանքով ընկավ Արցախը, կոտրվեց մեր անվտանգային համակարգը, թշնամին հասավ Կապանի տակ, Վարդենիսի ու Ջերմուկի սարեր։ Այսինքն, հայը հանցագործ, եղերագործ ու օկուպանտ է, Փաշինյանն ի՞նչ աներ։
Եվ նորից չպետք է հոգնել ու կրկնել, որ Հայաստանի գործող ղեկավարը սերիական մարդասպանի դաժանությամբ սպանեց իր զոհին ու հիմա բժիշկներին, զոհի ծնողներին, շտապօգնության վարորդին մեղադրում է, թե ինչո՞ւ առողջ չէին պահել զոհին, լավ որակով սնունդ չէին կերցրել, սրտին դանակի հարվածից հետո ինչո՞ւ նոր սրտի փոխպատվաստվում չարեցին։
Եթե Փաշինյանը Արցախը սպանեց ֆիզիկապես, հիմա սպանում է հային հոգեպես, բարոյապես։ Բայց նույն հային ոչ ոք չի փրկի, եթե ինքն է ուզում մեռնել ֆիզիկապես ու հոգեպես։ Ընդ որում, մեռնել որպես ագրեսոր, օկուպանտ, տարածաշրջանի պրոբլեմ։ Եթե հայը պրոբլեմ է, ուրեմն և կլինի կոնսենսուս, որ այդ պրոբլեմը լիկվիդացվի մեկ անգամ ու վերջնականապես»: