«Իմ կասկածյալներն են Նիկոլ Փաշինյանը, նրա կինը կամ մերձավորները». Էդգար Ղազարյան

Երևանի ընդհանուր իրավասության դատարանում մի քանի անգամ տարբեր պատճառաբանությամբ հետաձգվել են հասարակական, քաղաքական գործիչ Էդգար Ղազարյանի գործով դատական նիստերը։ Այսօր հերթական նիստն էր, որը մեղադրյալների պաշտպանական կողմի բացակայության պատճառով, կրկին հետաձգվեց։ Դատարանն անհարգալից համարեց նրանց վարքագիծը։ «Եթե հաջորդ նիստին էլ չգան, դատարանն իրավունք ունի նրանց հեռացնելու վարույթից և այդ գործով ներգրավի հանրային պաշտպանի»,- լրագրողների հետ զրույցում ասաց Էդգար Ղազարյանը։
Հիշեցնենք, որ 2022 թվականի հոկտեմբերի 18-ին Էդգար Ղազարյանը ՀՀ քննչական կոմիտե հաղորդում էր ներկայացրել այն մասին, որ նույն օրը՝ ժամը 11:15-11:30-ն ընկած ժամանակահատվածում, Երևան քաղաքի Եղբայրության փողոցի 16/2 շենքի բակում երկու անհայտ անձինք հարձակվել են իր վրա, ձեռքերով և ոտքերով հարվածներ հասցրել մարմնի տարբեր հատվածներին՝ պատճառելով մարմնական վնասվածքներ: Դեպքի առթիվ նույն օրը նախաձեռնվել էր քրեական վարույթ՝ ՀՀ քրեական օրենսգրքի 171-րդ հոդվածի 2-րդ մասի 5-րդ կետի հատկանիշներով։
Լրագրողների հետ զրույցում Էդգար Ղազարյանը հայտնեց, որ նախաքննական մարմինը չի պարզել հանցագործության պատվիրատուներին․ «Նախաքնննությունն, ըստ էության, դատարանում է տեղի ունենում, և ինձ հուզող բոլոր հարցերի պատասխանները պետք է դատարանում ստանամ»,- ասաց նա՝ նշելով, թե ովքեր են իր կասկածյալները․ «Ես ցուցմունք եմ տվել, այս պահին իմ կասկածյալներն են վարչապետ Նիկոլ Փաշինյանը, կամ նրա կինը՝ Աննա Հակոբյանը, կամ նրանց մերձավոր շրջապատի մարդիկ։ Նրանց հարցաքննության չեն կանչել, քննիչը մերժել է՝ ասելով, որ այդ պատկերացումները վերացական են և սուբյեկտիվ, թեպետ ես մի քանի հիմնավորումներ եմ տվել, որ իրենք անհանդուրժող են իրենց հանդեպ քննադատական խոսքի նկատմամբ»,- ասաց Ղազարյանը։